Nur-Sultanda 4 jáne 6% syıaqy mólsherlemesimen jeńildetilgen shaǵyn nesıe berý bastaldy. Bul týraly elorda ákimdiginiń baspasóz qyzmeti habarlaıdy, dep jazady Egemen.kz
Nátıjeli jumyspen qamtýdyń "Eńbek" memlekettik baǵdarlamasy aıasynda jyldyq 4 jáne 6% syıaqy mólsherlemesimen shaǵyn kásipkerlikti qoldaý úshin jeńildetilgen shaǵyn nesıeleý bastaldy. Negizgi qaryz boıynsha jeńildik kezeńi 12 aıǵa deıin, syıaqy úshin – 6 aıǵa deıin beriledi. Nesıeniń maksımaldy somasy – 5 jylǵa deıingi merzimge 20 mıllıon teńgege deıin. Eger ótinish berýshi kóp balaly nemese az qamtylǵan otbasy bolsa, onda syıaqynyń jyldyq mólsheri 4%-dy quraıdy.
Tolyq aqparat pen talap etiletin qujattar tizimin 8-800-080-035-05 baılanys ortalyǵyna nemese 8-701-555-71-24 nómiri arqyly alýǵa bolady. Meken-jaıy: Nur-Sultan qalasy, Turan dańǵyly, 19/1, 3 qabat, 306 keńse.
Sondaı-aq búginde Aýyl sharýashylyǵyn qarjylaı qoldaý qory óziniń nesıelik ónimderi arqyly aýyl turǵyndary men aýylsharýashylyq taýar óndirýshileriniń ártúrli maqsatty baǵyttardaǵy jobalaryn qarjylandyrady. Qordyń basty maqsaty – agroónerkásip keshenin damytý. Atap aıtqanda, bul mal sharýashylyǵy, egin sharýashylyǵy, aýyl kásipkerligin damytý, aýylsharýashylyq ónimderin qaıta óńdeý jáne saqtaý boıynsha jobalar.
Nátıjeli jumyspen qamtý jáne jappaı kásipkerlikti damytýdyń memlekettik baǵdarlamasy aıasyndaǵy nesıeler jyldyq 6% mólsherlememen ár túrli maqsatta qarastyrylady. Sonymen qatar eger áleýetti tutynýshy kóp balaly nemese az qamtylǵan otbasy bolsa, olar úshin syıaqy mólsheri jylyna 4%-dy quraıdy.
"Nesıelik ónimge baılanysty jeńildik kezeńiniń merzimi, mólsheri jáne uzaqtyǵy ártúrli bolatynyn eskerý qajet. Mysaly, mal sharýashylyǵyn damytý sheńberinde siz 12 mıllıon teńgege deıin qarjylandyrýǵa ótinish bere alasyz, munda nesıeniń eń uzaq merzimi – 6,5 jyl. Osy salada negizgi qaryzǵa 26 aıǵa deıin, syıaqy úshin – 9 aıǵa deıin eń joǵarǵy jeńildik beriledi. Egin sharýashylyǵyn damytýǵa baǵyttalǵan nesıege keletin bolsaq, nesıeniń maksımaldy somasy 6 mıllıon teńgege deıin jáne 3 jylǵa deıingi merzimge beriledi. Jeńildik merzimi – negizgi qaryzǵa jáne syıaqyǵa 12 aıǵa deıin", delingen habarlamada.
Kásipkerlikti damytý baǵytynda nesıeniń maksımaldy somasy 5 jyl merzimge 10 mıllıon teńgege deıin. Negizgi borysh boıynsha eń joǵarǵy jeńildik merzimi 12 aıǵa deıin, syıaqy úshin – 6 aıǵa deıin qarastyrylǵan.
Aýylsharýashylyq ónimderin qaıta óńdeý jáne saqtaý úshin nesıeniń maksımaldy somasy 6,5 jyl merzimge 15 mıllıon teńgege deıin. Negizgi qaryz boıynsha eń joǵarǵy jeńildik merzimi 24 aıǵa deıin, syıaqy úshin – 12 aıǵa deıin qarastyrylǵan.
2019 jyldan bastap Qor áleýetti klıentterge nesıeni aldyn-ala maquldaý mehanızmin engizdi. Osynyń arqasynda bıznes ókilderi bastapqy kezeńde nesıelik tarıhy men memleket aldyndaǵy qaryzdaryn úıden shyqpaı-aq tekserýge múmkindik alady. Tekserýden keıin áleýetti klıent qujattardy jınaýǵa kirise alady (online.kazagro.kz).
Aldymen nesıe alǵysy keletinder jumyspen qamtý ortalyǵynda jumyssyz nemese ózin-ózi jumyspen qamtyǵan retinde tirkelýi kerek. Odan keıin jumyspen qamtý ortalyǵy klıentti kásipkerlik negizderine sertıfıkat boıynsha oqýǵa "Atameken" Ulttyq kásipkerler palatasyna jiberedi. Oqý merzimi – 30 kún. Oqytýdy aıaqtaǵannan keıin klıent "Bıznes Bastaý" sertıfıkatyn alady. Sodan keıin ótinish berýshi buryn berilgen tizim boıynsha qujattardy jınaýǵa kirisedi. Qujattar tolyq jınalǵannan keıin, klıent qaryzǵa qujattar tapsyrý úshin Qor fılıalyna júgine alady. Nesıelik ótinimdi qaraýdyń maksımaldy merzimi – 14 kúntizbelik kún.