Qorǵanys mınıstrliginde ótken apta saıynǵy apparattyq keńes barysynda halyqaralyq yntymaqtastyq pen qazaqstandyq komandanyń "Tank bıatlony" saıysyna qatysýy, sondaı-aq áskerlerdiń kúndelikti tirshilik áreketi syndy máseleleri qaraldy, dep habarlaıdy Egemen.kz.
Qorǵanys mınıstri general-leıtenant Nurlan Ermekbaev TMD-ǵa qatysýshy memleketter, ShYU men UQShU músheleri áskerı vedomstvolary basshylarynyń, birlesken otyrysynyń qorytyndysyn baıandady. Otyrys barysynda áriptes elderdiń ózara is-qımyly, halyqaralyq qaýipsizdikti nyǵaıtý jáne óńirlik turaqtylyqty qoldaý máseleleri talqylandy.
Pandemııamen kúreske erekshe kóńil bólindi. Atap ótilgendeı, koronavırýstyq ınfeksııanyń taralý qaýpi, óńirlik uıymdardan birlesip áreket etý úshin kelisilgen is-qımyldar men tıisti úılestirýdi talap etedi.
Qorǵanys mınıstrleriniń kezdesýi halyqaralyq uıymdardyń jan-jaqty yntymaqtastyǵy men syndarly ózara is-qımylyna baǵyttalǵan birqatar mańyzdy sheshimderge qol qoıýmen aıaqtaldy. Atap aıtqanda, qorǵanys vedomstvolarynyń basshylary Uly Otan soǵysy men Ekinshi dúnıejúzilik soǵystaǵy Jeńistiń 75 jyldyǵyna arnalǵan birlesken kommıýnıke men otyrysqa qatysýshylardyń málimdemesine qol qoıdy. Sondaı-aq, TMD, UQShU jáne ShYU Mınıstrler Keńesiniń 2021 jylǵa arnalǵan jumys josparlary bekitildi.
Armııa halyqaralyq oıyndarynyń qorytyndylary da talqylandy. Qazaqstan alǵash ret bir «Tank bıatlony» saıysyna ǵana qatysty. Birinshilik úshin álemniń 32 elinen úzdik áskerı mamandar baq synasty. Tank bıatlony jarysynda bizdiń tankishiler 16 eldiń, sonyń ishinde Reseı, Belarýs jáne Qytaıdyń úzdik tank ekıpajdarymen qatar óner kórsetti.
"Tank bıatlonynyń" nátıjelerin taldaı otyryp, mınıstr aldaǵy ýaqytta komandany daıyndaýdaǵy qazirgi tájirıbeni eskerýdi, jaýyngerlik mashınalardyń jetildirilgen úlgilerimen tehnıkalyq jabdyqtaý máselesin pysyqtaýdy jáne jattyqtyrýshylar quramyn kúsheıtýdi tapsyrdy.
Keńestiń kelesi taqyryptyq bóligine aýysa otyryp, áskerı vedomstvo basshysy Prezıdenttiń Qazaqstan halqyna Joldaýy mátininde Qarýly Kúshterdegi sıfrlandyrýdyń rólin atap ótti.
"Qazaqstan halqyna jyl saıynǵy Joldaýynda Prezıdent sıfrlandyrýdy barlyq reformalardyń negizgi elementi dep atady. Sıfrlandyrý –sán úrdisterin ustaný emes, bul ulttyq básekege qabilettilikke qol jetkizýdiń negizgi quraly", - dep atap ótti mınıstr. Búginde Qarýly Kúshterde atalmysh baǵytty damytýǵa erekshe kóńil bólýde. Áskerlerdi basqarýdyń avtomattandyrylǵan júıeleri belsendi túrde engizilýde, qaǵaz qujat aınalymy qysqartylyp, onlaın, onyń ishinde mobıldi qosymshanyń kómegimen kórsetiletin qyzmetter sanynyń aýqymy keńeıýde.
Keńes barysynda qorǵanys vedomstvosynyń basshysyna Prezıdenttiń Qazaqstan halqyna Joldaýyn jetkizý jáne túsindirý úshin aqparattyq-túsindirý tobyn qurý týraly baıandaldy. Onyń mindeti – árbir áskerı qyzmetshige bolashaqqa baǵdar beretin baǵdarlamalyq qujattyń mánin jetkizý.
Mınıstrge áskerlerdiń jaǵdaıy men ótken aptada ótkizilgen is-sharalar týraly baıandaldy. Áskerlerdiń kúndelikti jumysy, bekitilgen daıarlyq josparlaryna sáıkes uıymdastyrylǵan. Bul rette karantındik shekteýler de qatań saqtalady. Jalpy, Qarýly Kúshterdegi sanıtarlyq-epıdemıologııalyq jaǵdaı turaqty. Koronavırýstyq ınfeksııamen aýyrǵan áskerı qyzmetshiler tirkelgen joq. Áskerı dárigerler jeke quram densaýlyǵynyń qaýipsizdigi maqsatynda profılaktıkalyq jáne epıdemııaǵa qarsy is-sharalardyń qajetti keshenin qamtamasyz etedi.
Qarýly Kúshterdi qysqy kezeńge daıyndaý boıynsha aýqymdy jumys kútip tur. Qorǵanys vedomstvosynyń basshysy barlyq is-sharalardy uıymdastyrý jáne ýaqtyly aıaqtaý jóninde tıisti tapsyrmalar berdi. Atap aıtqanda, barlyq kommýnaldyq nysandardyń jylytý maýsymyna daıyndyǵyn qamtamasyz etý. Ol úshin kazarmalyq-turǵyn úı qorynyń, ákimshilik ǵımarattardyń jylytý jabdyqtaryna tekserý júrgizý qajet. Jeke quramdy zattaı múlikpen ýaqtyly qamtamasyz etý de mańyzdy. Bul máseleni sheshýdi mınıstr barlyq dárejedegi komandırlerge tapsyrdy.
"Sonymen qatar, qysqy kezeńge qarý–jaraq pen áskerı tehnıkany daıyndaý qajet", - dedi qorǵanys vedomstvosynyń basshysy.
Qysqa daıyndyq jumystaryn uıymdastyrý jáne ótkizý kezinde mınıstr, barlyq laýazymdy tulǵalarǵa jeke quramnyń qaýipsizdik sharalaryn saqtaýyna erekshe nazar aýdarýdy tapsyrdy.