Maska taǵý jáne áleýmettik qashyqtyqty saqtaý erejeleri almatylyqtardyń kúndelikti ádetine aınalýy tıis. Buǵan deıin óńirlik kommýnıkasııalar qyzmeti alańynda ótken onlaın brıfıng barysynda, Jas Otan jastar qanatynyń Almaty qalalyq fılıalynyń jetekshisi Mádı Ahmetov pen "Qazaqstan eriktileri lıgasy" QQ Almaty fılıalynyń tóraıymy Baǵdat Anarbaeva almatylyqtarǵa karantın sharalarynyń jeńildegenine qaramastan, Qalanyń bas sanıtar dárigeriniń talaptaryn saqtaýdy suraıdy, dep habarlaıdy Egemen.kz.
"Elimizdiń Prezıdenti koronavırýs ınfeksııasymen kúres aldaǵy eki jyl boıy jalǵasatynyn naqty atap ótti. Almatyda karantın talaptary birtindep jeńildep kele jatqanyn bilemiz, biraq osyǵan qaramastan kún saıyn qorǵanys sharalaryn qatań ustanýymyz kerek: áleýmettik qashyqtyqty saqtaý, medısınalyq bir rettik maska taǵý, qoldy jıi jýý. Bul erejeler almatylyqtardyń kúndelikti ádeterine aınalýy tıis. Biz óz densaýlyǵymyzdy, jaqyndarymyzdyń densaýlyǵyn qorǵaýymyz kerek. Men jastardy barlyq sanıtarlyq sharalardy saqtaýǵa shaqyramyn", - dedi Mádı Ahmetov.
"Qazaqstan Eriktiler lıgasy" QQ Almaty fılıalynyń tóraıymy Baǵdat Anarbaeva áriptesin qoldap, qalalyqtardy óz densaýlyǵyna jaýapkershilikpen qaraýǵa shaqyrdy.
"Biz Almaty qalasynyń eriktileri retinde monıtorıng toptarymen birlese otyryp, turǵyndardyń qaýipsizdigi úshin úlken túsindirý jumystaryn júrgizemiz. Barlyq turǵyndarǵa, oqyrmandarǵa, tyńdaýshylarǵa taǵy da habarlaǵym keledi: jaqyndarymyzdyń, týystarymyzdyń, aınalamyzdaǵy adamdardyń jáne bizdiń qaýipsizdigimiz-ózimizdiń qolymyzda. Sondyqtan karantın rejımin, sanıtarlyq normalardy, áleýmettik qashyqtyqty saqtaý, maska taǵý, qoldy antıseptıkpen óńdeý, qoldy jıi jýý bizdi jáne jaqyndarymyzdy osy aýrýdan qorǵaıdy", - dep tolyqtyrdy Baǵdat Anarbaeva.
Esterińizge sala keteıik, Almaty qalasynyń ákimdigi karantınniń alǵashqy kúnderinen bastap (2020 jylǵy 16 naýryz) jastar loft-ortalyǵy bazasynda jedel volonterlik shtab qurdy. Onyń quramyna qala eriktileri, medısına jáne qoǵamdyq uıymdar kirdi. Qala boıynsha myńǵa jýyq erikti jumys isteıdi. Onyń ishinde Shtabta turaqty qyzmet etetin 100 erikti saqtyq sharalardy ustaný, tazalyqty saqtaý, koronavırýs taraǵan kezde jasy úlken kisilermen sóılesý tártibin úıretetin arnaıy kýrstan ótti.
Qazirgi tańda eriktiler kópbalaly jáne az qamtylǵan 193 otbasyǵa maska taratty. 166 nysanda qoǵamdyq morıtorıng júrgizilip, 80 nysanda tártip buzýshylyq anyqtaldy. Osyǵan saı atqarýshy organdar tıisti sharalar ( jumys isteýine shekteý qoıylǵan saýda- sattyq nysandary) qoldandy. 6250 turǵynǵa aqparattyq- túsindirme jumystary 8(727)2791691 telefony arqyly júrgizildi. Kúndelikti 100- ge jýyq qońyraýǵa jaýap beriledi.