Jýyrda «ANTIKOR LIVE» jobasy aıasynda «Shyǵys – adaldyq alańy» jobalyq keńsesiniń uıymdastyrýymen «Jańa oqý jylyna satyp alynǵan kompıýterlerdi bólý ashyqtyǵy» taqyrybynda tikeleı efır ótti.
Mekteptegi kompıýterlik tehnıka oblys oqýshylary men pedagogterine ýaqytsha paıdalanýǵa beriledi. Bul týraly «Antikor Ortalygy» servıstik ortalyǵynda ótken tikeleı efırde oblystyq bilim basqarmasynyń basshysy Saırangúl Jumadilova habarlady. Onyń málimetinshe, óńir oqýshylaryn qashyqtan oqytý úshin respýblıkalyq bıýdjetten 26 myńnan astam noýtbýk, kompıýter jáne planshet satyp alýǵa 4,1 mlrd teńge qarajat bólingen.
– Búginde biz 550 birlik tehnıka aldyq. Onyń onlaın oqytýǵa qajetti sıpattamalarǵa sáıkestigin tekserý úshin IT-tehnologııalardyń jetekshi mamandary tartylatyn bolady. Oblys oqýshylary men muǵalimderin kompıýterlik tehnıkamen qamtamasyz etý rásimi 15 tamyzdan bastaldy. Birinshi kezekte halyqtyń áleýmettik osal toptarynyń oqýshylary, sondaı-aq oqý ozattary qamtamasyz etiledi, – dep atap ótti S.Jumadilova.
Búginde oblysta úıde kompıýterlik tehnıkasy joq 23 myńnan astam oqýshy bar. Olardyń barlyǵy qajetti jabdyqtarmen qamtamasyz etiledi. Qalǵan 3 myńǵa jýyq kompıýter men planshet tehnıkasy eskirgen mektepterge taratylady. Bul úderistiń ashyqtyǵyn aımaqtyq sybaılas jemqorlyqqa qarsy is-qımyl departamenti men «Shyǵys – adaldyq alańy» jobalyq keńsesiniń ókilderi kiretin arnaıy jumys komıssııasy qamtamasyz etetin bolady.
О́SKEMEN