Memleket basshysy qyrkúıektegi Joldaýynda dıplom basyp shyǵarýmen aınalysyp júrgen joǵary oqý oryndaryn qysqartý jumysyn jalǵastyrýdy tapsyrǵan-tyn. Al keshe Bilim jáne ǵylym mınıstrligi 30-dan asa otandyq ýnıversıtettiń memlekettik tapsyrys ala almaıtynyn habarlady. Demek, bul JOO-da memlekettik grant ıegerlerin oqytýǵa múmkindik joq. Degenmen onyń qysqartýǵa qanshalyqty áser etetini ázirge belgisiz.
Mundaı sheshimdi Joǵary jáne joǵary oqý ornynan keıingi bilimi bar kadrlardy daıarlaýǵa arnalǵan memlekettik tapsyrysty ornalastyrý jónindegi Respýblıkalyq konkýrstyq komıssııa shyǵarǵan. Atalǵan komıssııanyń quramyna Parlament depýtattary men múddeli memlekettik organ ókilderi kirdi. Sondaı-aq komıssııa quramyna «Atameken» ulttyq kásipkerler palatasy men Joǵary oqý oryndary qaýymdastyǵynyń ókilderi jáne qoǵam qaıratkerleri, sonyń ishinde Prezıdent janyndaǵy Ulttyq qoǵamdyq senim keńesiniń músheleri de bar.
Joǵary jáne joǵary oqý ornynan keıingi bilim departamentiniń dırektory Ádilet Toıbaev komıssııanyń sheshimine qatysty:
«Memlekettik tapsyrysty ornalastyrý kezinde qoǵam barynsha ádildikti talap etti. Bıyl biz muny júzege asyrdyq. Degenmen bul sheshim belgili bir joǵary oqý oryndary tarapynan narazylyq týdyratynyn bildik. Respýblıkalyq komıssııanyń sheshimi boıynsha konkýrs talaptaryna sáıkes kelmeıtin 30-dan asa JOO 2020-2021 oqý jylyna arnalǵan memlekettik bilim berý tapsyrysy ornalastyrylatyn joǵary oqý oryndarynyń tiziminen shyǵaryldy. Baıqaýǵa barlyǵy 108 joǵary oqý orny qatysty. Memlekettik tapsyrys ornalastyrylǵan joǵary oqý oryndarynyń sany aıtarlyqtaı qysqardy. Máselen, «Quqyq» bilim berý baǵdarlamalarynyń toby boıynsha tek 10 joǵary oqý ornynda memlekettik grant boıynsha oqytýǵa múmkindik berildi, basqa baǵdarlamalar boıynsha da eleýli ózgerister bar», dedi.
Mınıstrliktiń málimdeýinshe, memlekettik tapsyrysty ornalastyrýda joǵary oqý oryndaryn bilim berý baǵdarlamalary boıynsha akkredıtteý, túlekterdiń jumysqa ornalasý paıyzy, bilim berý baǵdarlamalarynyń sapasy jáne joǵary oqý ornynyń «Atameken» ulttyq kásipkerler palatasy reıtıngindegi pozısııasy eskerilgen.
Aıta keteıik, «Atameken» ulttyq kásipkerler palatasynyń reıtıngi elimizdegi joǵary oqý oryndar sanyn qysqartýda da esepke alynyp júr. Buǵan deıin atalǵan reıtıngte tómen kórsetkishterdi ıelengen eki birdeı otandyq ýnıversıtet lısenzııasynan aıyrylyp, jabyldy. Qazir Bilim jáne ǵylym mınıstrligi «Astana» ýnıversıtetine jospardan tys tekseris júrgizip jatyr.