Qaı bir jyldary Shybyndykóldiń jaǵasynda elimizdiń eń sheber sýretshileri etıýd jazǵan. Tabıǵattyń san túrli reńin kenepke túsirgen qylqalam sheberleri jas sýretshilerge de baǵyt-baǵdar bergen bolatyn. Sondaǵy jastardyń ishinen «bilsem, úırensem» dep umtylyp turǵandardyń biri – Olga Chavkına edi. Bilimi esh ketpedi. «100 jańa esim» jobasynyń jeńimpazy atandy.
О́skemendik qyz óner jolynda az ter tógip júrgen joq. Bala jasynan aldyna maqsat qoıdy. Armanyna jetý jolynda tabandy eńbek etti, izdendi, oqydy. Belgili sýretshi Nıkolaı Ashtemanyń stýdııasynda ónerdiń qasıetin, boıaýdyń syryn sezinip baryp kolledjge oqýǵa tústi. Qumash Nurǵalıev atyndaǵy bilim ordasynda bilikti ustazdardan tálim aldy.
– Es bilgeli sýretshi bolýdy armandadym. О́z stýdııam bolsa deıtinmin. Teledıdardan úlken sýretshilerdi kórsetip jatqanda kóz almaı qarap otyratynmyn. Qysh qumyrada turǵan qylqalamdaryna, kerilgen kenepterine qyzyǵatynmyn. Jalpy sheberhanalarynyń atmosferasyn sezingim keletin. Jaqyndaryma, ustazdaryma alǵysym sheksiz. Solardyń qoldaýlarynyń arqasynda armanyma jettim, deıdi Olga Chavkına.
Armanynan adaspaǵan sýretshi qyz oqý qabyrǵasynda júrgende О́skemenniń saıabaqtarynda etıýd jazyp, sheberligin shyńdaıtyn. Shyndyǵynda sheberligin shyńdaıyn dep emes, maıly boıaýmen kartına jazýdy jany qalaǵan soń qylqalamyn qolǵa alatyn. Súırik saýsaqtarymen týǵan qalasynyń kórikti kóshelerin kenepke túsiretin. Kartınalary qanyq shyqqan saıyn shabyttana jazatyn.
Bir aqıqaty, Olga o basta óner arqyly tabys tabýdy kózdemegen. О́nerdiń qadirin, qasıetin qashyrǵysy kelmese kerek, satý úshin jarqyraǵan sýret salǵan joq. Keıin ǵana stıli qalyptasyp, tájirıbesi tolysqan soń tapsyryspen portret, peızaj sala bastaǵan. Tapsyrystyń ózin taqyrybyna, mańyzyna qaraı qabyldaıdy. Sátti shyqqan avtorlyq taqyryptyq jumystaryn alys-jaqynnan kelgen sheteldik kolleksıonerler quda túsip, qun tólep satyp ta alǵan.
Jalyndy jasqa eldegi baǵdarlamalardyń da zor paıdasy tıdi. 2018 jyly áleýmettik «Zhas Project» jobasynda memlekettik grant utyp alyp, shyǵarmashylyǵyn jańa beleske kóterdi. Atalmysh joba aıasynda kópbalaly jáne áleýmettik ál-aýqaty tómen otbasylardyń balalaryn jınap, beıneleý ónerinen tegin úıirme ótkize bastady. Bir shańyraq astyna qylqalam ustaǵan О́skemenniń ónerli jastaryn uıystyrdy. Osylaısha oblys ortalyǵynda «Perfomance» art-stýdııasyn quryp, esigin aıqara ashty.
Bastary ónerde toǵysqan jas ujym volonterlik jumystardan da shet qalyp kele jatqan joq. Sýretshilik, dızaınerlik mamandyqty tańdaǵan túlekterge sheberlik sabaqtaryn ótkizedi. Olga Erjanqyzy О́skemen qalalyq jastar máslıhatynyń depýtaty bolǵan soń múmkindiginshe shahardaǵy qoǵamdyq jumystarǵa da aralasyp turady. Ásirese jastar máselesine kelgende óziniń ustanymy, oı-pikiri bar.
– Meniń oıymsha talanttar tasada qalmaýy tıis. Jumystaryn kórsetýimiz kerek. Osy ýaqytqa deıin jas sýretshilerdiń týyndylarynan birneshe kórme uıymdastyrdyq. Kópshilikke unady. Ásirese «My Self» jobasy aıasyndaǵy kórme qalalyqtardy qyzyqtyrdy, – deıdi «100 esim» jobasynyń jeńimpazy.
Sonymen qatar art-stýdııa sheberleriniń kórmesi byltyr Semeıdegi Nevzorovtar otbasynyń mýzeıinde «Rýhty Shyǵys» art-festıvali aıasynda ótti. Qandaı kórme bolsyn, Olga Chavkına portrettermen qatar tabıǵatta jazǵan polotnolaryn usynady. О́ıtkeni tabıǵatta jazylǵan kenepten shyǵarmashylyqtyń ıisi ańqyp, dala saryny sezilip turady deıdi. Sondyqtan da Olga ara-tura Shyǵystyń kórikti jerlerin aralaıdy. Tabıǵat aıasyna etıýdnıgin quryp qoıyp, aınalasynan kenepke túsiretin tústerdiń úılesimin izdeıdi. Osyndaıda sýretshi jany tabıǵatpen úndesip, shynaıy týyndy dúnıege keledi. Máselen, ótken jyldary Muztaýdyń etegine arnaıy baryp, Kókkóldi kenepke túsirgen. Bas salyp túsire salǵan joq, aldymen kórý núktesin izdegen. Ár tustan qaǵazǵa nobaıyn syzyp kórgen. Ábden úılesim tapqan soń baryp maıly boıaýmen jazǵan. Keıin ol shyǵarmasy ónertanýshylardyń, kásibı sýretshilerdiń joǵary baǵasyna ıe boldy. «Altaı – Qazaqstannyń injý-marjany» atty halyqaralyq plenerge eń jas sýretshi retinde qatysyp, sátti-sátti polotnolar jazǵany taǵy bar.
Olga Erjanqyzy peızajdyń ǵana emes, portret salýdyń da sheberi. Kimniń portretin salsa da jan-dúnıesine tereń úńilip baryp qolyna qaryndash alady. Shynaıylyqqa jaqyn qyz portretti de natýradan qarap salýdy jón dep sanaıdy. Iаǵnı keıipkeri qarama-qarsy otyrǵanda ǵana minez-qulqy, bar bolmysy portrette tolyq ashylatyn kórinedi.
Sýretshi qyzdyń aıtýynsha, sheberhana qabyrǵasynan shyqpaı kartına jazý múmkin emes. Stýdııada sheberdiń palıtrasy jattandy, birizdi bolyp ketedi. Al Olga shetelderge de baryp turatyn. Bıyl ǵana eldegi jaǵdaıǵa baılanysty sheberhana shańyraǵynan kóp shyqpady. Onyń ózinde onlaın túrde elimizdiń, sheteldiń tanymal sýretshilerimen tájirıbe almasyp otyrdy. Oqýshylarǵa onlaın túrde úıirme ótkizdi.
– Qazir kórme uıymdastyrýǵa shekteý qoıylǵanymen, onlaın formatta sheberlik sabaqtary júredi. Sýretshilikke qyzyǵyp, nıet bildirip jatqan oqýshylar kóp. Sýret óneri – baladan mindetti túrde sýretshi shyǵarý úshin emes, oı-órisin damytyp, qııalyn ushtaýǵa paıdasy mol. Bálkim erteń ol bala ınjener, sáýletshi, dızaıner bolyp elimizdiń gúldenýine úles qosar, – deıdi sýretshi qyz.
Ras, beıneleý óneri – sonaý zamannan óz qundylyǵyn, qoǵamǵa qajettiligin joǵaltpaı kele jatqan óner. Al shyǵarmashylyqqa shyn berilgen Olgadaı jastar barda beıneleý óneri qanatyn keńge jaıyp, jas talanttardyń talabyn ushtaı beredi.
О́SKEMEN