Prezıdent janyndaǵy Ortalyq kommýnıkasııalar qyzmetinde ótken brıfıngte birqatar bilim berý platformalarynyń jumysy talqylandy.
Sıfrlyq damý, ınnovasııalar jáne aeroǵarysh ónerkásibi mınıstrligi janyndaǵy Baılanys salasyndaǵy memlekettik saıasat jáne ınfraqurylym departamentiniń dırektory Gúlnár Bókeeva qashyqtan oqytýdy qoldaý maqsatynda baılanys operatorlarymen birlese otyryp «Bilim» atty tarıftik jospardyń sharttaryn qaıta pysyqtap shyǵarǵanyn jetkizdi. Onyń aıtýynsha, bul tarıftik jospardyń abonenttik tólemi 990 teńgeni quraıdy. Atalǵan tarıftik jospar otandyq bilim berý resýrstarynyń bárin sheksiz qoldanýǵa múmkindik pen qosymsha 1 Gbt ınternet beredi.
Al «Daryn.online» bilim berý platformasynyń ókili Erjan Ońalbaev:
«Bizdiń platforma qyzmetkerleriniń tynymsyz jumysy nátıjesinde qazaq synyptaryna arnalǵan vıdeo sabaqtar tolyǵymen túsirilip, saıtqa ornalastyryldy. Orys synyptaryna arnalǵan vıdeo sabaqtardyń 95 paıyzy portalymyzda tur. Qazirgi tańda «Daryn.online» platformasymen 500 myń qoldanýshy bilim alyp otyr. Kúnine 200 myń devaıs arqyly «Daryn.online» saıtyna kiredi. Bul degenimiz – bir telefon, planshet nemese kompıýter arqyly 2-3 adam qoldanyp otyr degen sóz. Bir táýlik ishinde platformamyzda 5 mln vıdeo qaralyp, 50 mln test suraqtaryna jaýap beriledi», dedi.
«Kúndelik» jobasynyń bas dırektory Muhtar Ilııasov óz kezeginde «Kúndelik.kz» platformasynyń memleket-jekemenshik seriktestik retinde 2016 jyldan beri jumys istep kele jatqanyn jetkizdi.
«Mektepter, memlekettik mekemeler, bilim basqarmalary platformamyzdy tegin qoldanady. Biz ótken IV toqsandaǵy tájirıbege súıenip IT júıeniń jumysyn jaqsarttyq. Osylaısha barlyq júıeniń ınfraqurylymy 30 paıyzǵa keńeıtildi. Sonyń nátıjesinde jańa oqý jylynda tehnıkalyq aqaýlar bolmady. Qazirgi tańda bizdiń júıeni 6 200 mektep qoldanady. Naqty aıtqanda, 332 600 muǵalim, 2 838 563 oqýshy men 2 mln 16 990 ata-anaǵa qyzmet kórsetip otyrmyz. «Kúndelik.kz» ataýynda kórsetilip turǵandaı, 1-11 synyptarǵa arnalǵan akademııalyq prosesti tolyǵymen qamtıdy», dedi M.Ilııasov.
«Gardeks Qazaqstan» JShS dırektory Altynbek Kúmisbekov «Sfera» platformasynyń jumysymen tanystyrdy. Onyń aıtýynsha, atalǵan bilim berý platformasy qashyqtan oqytýdy tıimdi júrgizýge kómektesýdi kózdeıdi. Ázirge «Sfera» platformasy tek Almaty qalasy boıynsha jumys isteıdi. Soǵan qaramastan qazirdiń ózinde «Sferanyń» qoldanýshylar sany 160 myńnan asqan. Kúnine shamamen 1,5 myń sabaq ótedi. Bolashaqta Qazaqstannyń basqa da óńirlerindegi bilim berý uıymdarymen jumys isteýdi josparlap otyr.