QR Aqparat jáne qoǵamdyq damý mınıstrligi jáne "Medıa damytý qory" korporatıvtik qory búgin "Úrker" - 2020 ulttyq syılyǵyna qatysý úshin ótinimder qabyldaýdyń bastalǵany týraly habarlady.
Ulttyq syılyq baspa, radıo, ınternet-jýrnalıstıka salasyndaǵy úzdik jetistikteri úshin beriledi, jýrnalıstıka mártebesin arttyrýǵa, ony nasıhattap ereksheleıtin kásibı standarttar men krıterılerdi bekitýge baǵyttalǵan. Konkýrs maqsaty – talantty jýrnalıster men shyǵarmashylyq ujymdardy anyqtaý, olardyń kásibı jýrnalıstıkany damytýǵa qosqan úlesterine qurmet kórsetý.
Báıgege kontentti óndiretin jáne taratatyn respýblıkalyq jáne óńirlik radıostansııalar, baspa jáne ınternet-basylymdar qatysa alady.
Aǵymdaǵy jyly bolǵan álemdik ózgeristerge baılanysty «Úrker» Ulttyq syılyǵy kúz maýsymynda ótkiziledi. О́tinimder 2020 jyldyń 02 qazanynan 02 qarashasyna deıin qabyldanady.
Konkýrstyq jumystarǵa qoıylatyn talaptar:
- jumystar 2019 jyldyń 1 qańtary men 2020 jyldyń 01 qarashasy aralyǵynda jarııalanýy tıis;
- jumystar baspa basylymynda, ınternet-resýrsta jarııalanýy nemese radıoefırde shyǵýy tıis.
«Úrker-2020» Ulttyq syılyǵynyń jeńimpazdaryn marapattaý rásimi onlaın formatta 2020 jyldyń 13 qarashasynda ótedi.
Bıylǵy jyly «Úrker - 2020» syılyǵy 11 nomınasııa boıynsha marapattalady:
Jyldyń úzdik fotosýreti; Jyldyń úzdik reportajy; Jyldyń úzdik analıtıkalyq materıaly; Jyldyń úzdik jýrnalıstik zertteýi; Jyldyń úzdik suhbaty; Jyldyń úzdik tanymdyq materıaly; Radıostansııadaǵy úzdik joba; Jyldyń úzdik jańalyqtar portaly; Jyldyń úzdik gazeti; Jyldyń úzdik jýrnaly; Sherhan Murtaza atyndaǵy Nomınasııa.Bıylǵy jyly pýblısısterge jeke nomınasııa arnaldy. Nomınasııa Sherhan Murtazanyń qurmetine ataldy. Sherhan Murtazanyń esimimen tek qazaq ádebıeti ǵana emes, otandyq jýrnalıstıka da baılanysty. Qazaqstandyq pýblısıstıka salasynyń maıtalmany kásibı jýrnalısterdiń birneshe býynyn tárbıelegen edi. Búgingi qoǵam ómiriniń ózekti máseleleri men qubylystaryna óz jumystaryn arnaǵan avtorlar atalmysh nomınasııaǵa úmitker bola alady. Materıaldar baspa nemese ınternet-basylymdarda qazaq nemese orys tilderinde jarııalanýy tıis.
Baıqaý jumystaryn bedeldi jýrnalıster, salanyń eńbek sińirgen qaıratkerleri jáne halyqaralyq medıa sarapshylardan quralǵan táýelsiz qazylar alqasy baǵalaıdy.
Konkýrs qorytyndysy boıynsha ár nomınasııanyń úzdik ókiline jeńimpaz ataǵy berilip, «Úrker-2020» estelik músinshesi jáne 1 000 000 teńge mólsherindegi aqshalaı syı tabystalady. Konkýrsqa qatysý úshin úmitkerler https://urker-awards.kz/ru/ resmı saıtyndaǵy tıisti ótinimdi toltyrýy qajet.