Túrkistan oblysy Keles aýdanynyń sharýalary «QazAgroQarjy» AQ-nyń kómegimen aýyl sharýashylyǵy tehnıkalaryn jańartýda. Mysaly, Qoshqarata aýyldyq okrýginde ornalasqan «Jańa Qonys» JShS-y lızıngke 2 birdeı traktor kóligin agregattarymen alǵan.
"Bıyl elimizde qurastyrylyp jatqan «LOVOL - 904» dep atalatyn tehnıkalardy aldyq. Árqaısysy 10 mln teńgeden boldy. «QazAgroQarjy» uıymynyń kómegimen lızıng boıynsha alynǵan traktorlardyń 15 paıyzyn bastapqy jarna retinde ózimiz tóledik. Qalǵan 85 paıyzyn «QazAgroQarjy» tólep berdi. Endi 7 jyl ishinde nesıemizdi tólep, qutylamyz degen josparymyz bar. Jalpy bizdiń mekemede 7 tehnıka bar, 10 azamat turaqty jumys isteıdi. Sondaı-aq, 750 gektar jaıylym, 129 gektar egistik jerimiz bar", – deıdi seriktestik dırektory Qurmanǵalı Turymbetov.
Jalpy Keles aýdanynyń aýmaǵynda búginge deıin 1098 aýyl sharýashylyǵy tehnıkasy tirkelgen. 2018 jyldan beri 45 tehnıka jańalanǵan. Onyń ishinde bıyl 12 aýyl sharýashylyǵy tehnıkasy satyp alyndy. Ol tehnıkalardyń beseýi «KazAgroQarjy» AQ kompanııasy arqyly lızıngke alynǵan. Taǵy úsh tehnıkaǵa lızıng sharty jasalǵan jáne qarasha aıyna deıin satyp alynbaq. Al jeti tehnıkany aýyl sharýashylyǵy taýaryn óndirýshiler óz qarajatyna alǵan.
Túrkistan oblysy