Elimizdegi áýejaılar bıylǵy 8 aıda shamamen 6,2 mln jolaýshyǵa qyzmet kórsetti. Bul ótken jyldyń tıisti kórsetkishinen (11,8 mln adam) 47% az.
Osy kezeńde 3,2 mln jolaýshy tasymaldandy. Bul kórsetkish te ótken jyldyń sáıkes kezeńimen (5,6 mln jolaýshy) salystyrǵanda 43% tómen.
Buǵan álemde koronavırýs ınfeksııasynyń taralýyna baılanysty Qazaqstan aýmaǵynda áýe reısterin oryndaýǵa engizilgen shekteýler áser etti.
Qazirgi ýaqytta ishki reıster, sonymen qatar Ońtústik Koreıa, Nıderlandy, Birikken Arab Ámirlikteri, Germanııa, Túrkııa, Belarýs, Ýkraına, О́zbekstan, Qyrǵyzstan, Egıpet jáne Reseı sııaqty 11 elge tikeleı halyqaralyq jolaýshylar reısi oryndalýda.
Barlyq reıster QR Kóliktegi Bas sanıtarlyq dárigeriniń qaýlysyna sáıkes sanıtarlyq-epıdemıologııalyq qaýipsizdiktiń sharalaryn qatań saqtaı otyryp, oryndalady.
Elimizdiń barlyq áýejaılarynda dezınfeksııalyq jumystar júrgizilýde. Qoldy óńdeýge arnalǵan sanıtaızerler ornatylyp, karantındik sharalar (áleýmettik qashyqtyq, betperde taǵý, qolǵap kııý) saqtalady. Áýejaı ǵımarattaryna kireberiste jolaýshylar men áýejaı qyzmetkerleri arasynda qashyqtyq saqtap, termometrııamen ólsheý júrgiziledi.