Túrkistandyq jastar eki kúnin aýyldyń tynys-tirshiligimen tanysýǵa arnady. "Aýyldaǵy bir kúnim" televızııalyq realıtı-shoýy aıasyndaǵy "Mal men egin – kól-kósir ónim" saıysynda oblystaǵy belsendi de, ónerli volonterlar aýyl tirshiligimen tanysyp qana qoımaı, jarysqa tústi, dep habarlaıdy Egemen.kz.
Birneshe týrdan turatyn saıystyń negizgi maqsaty - aýyl sharýashylyǵyn jastar arasynda dáripteý, jastardyń eńbek qabilettiligin arttyryp, baýlý. Sondaı-aq oblysymyzdaǵy iri sharýashylyq ortalyqtardyń jumysyn jastar arasynda nasıhattaý men aýyl jastarynyń aýyl sharýashylyǵy salasyndaǵy kásipkerlik belsendiligin arttyrý.
Bul jobaǵa 16 aýdan-qaladan 2 qatysýshydan qatysyp, olar jerebe boıynsha tórt komandaǵa bólinip, jarysty. Jarystyń alǵashqy kúni Qazyǵurt aýdanyndaǵy baqtan alma terýmen bastalyp, arty jigitter qaýymynyń qoı qyrqýyna ulasty. Alǵashqy saıysta "Syrdarııa" quramasy basym tússe, qoı qyrqý kezinde "Alataýdyń" jigitteri eptiligimen alǵa shyqty. Jigitterdiń aıtýynsha, qoı qyrqýdy alǵash ret kórip turǵandary da bar, soǵan qaramastan olar uıymdastyrýshylardyń tapsyrmasyn joǵary dárejede oryndaýǵa tyrysty.
Al saıystyń ekinshi kúni Saýran aýyldyq okrýginde kartop qazyp, ony jınaýmen bastaldy. Bul jerde qatysýshylardyń kartop jınaýdaǵy jyldamdyqtary men salmaq boıynsha basymdylyqtary eseptelip, nátıje boıynsha "Syrdarııa" toby alǵa shyqty. Áriqaraı qatysýshylar saıysty maqta alqabynda jalǵastyrdy. "Ońtústik - aq altynnyń Otany" sanalatyndyqtan, bul saıystyń jastarǵa tapsyrma retinde berilýi zańdy. Maqta terý kezinde qatysýshylardy baǵalaǵan qazylar onyń tazalyǵyna, salmaǵyna jiti mán berdi.
"Maqta – ońtústiktiń maqtanyshy. Negizinen elimizdiń ońtústiginde ǵana ósedi jáne bizdiń oblysymyzdyń ekonomıkasyna da aıtarlyqtaı tabys alyp keletin sharýashylyq túri. Qazirgi jastar maqta alqabyna jıi barmasa da búgingi saıysta barynsha eptilikterin kórsetip jatyr. Olardy jan-jaqty saralaı kele "Turan" men "Syrdarııa" komandalaryna birdeı upaı berdik, al "Qarataýlyqtar" az ǵana upaımen artqa shegindi", dedi Qazylar alqasynyń tóraǵasy, Túrkistan oblysy Aýylsharýashylyq basqarmasynyń bas mamany Ábdibaı Mustafaev.
Eki kún boıy aýyr ári qyzyqty jumystarmen saıysqan jas volonterlar jarys sońynda ıntellektýaldylyq jaǵynan da synǵa tústi. Qazaqtyń salt-dástúri men yrym-tyıymdarynan habarynyń da joq emestigin kórsetti.
"Bul - jastardy eńbekke baýlýǵa arnalǵan jaqsy joba. Bizdiń Túrkistan oblysy halqynyń 80 paıyzy aýyldy eldi-mekende turady. О́ńirimizde aýyl sharýashylyǵy áleýeti qarqyndy damyp keledi, bul atadan balaǵa mıras bolyp kele jatqan kásip. Ata kásiptiń jandanýy, aýyl sharýashylyǵyndaǵy ınnovasııalyq damý, sharýashylyqqa jańa tehnologııalardy endirý - endigi jastardyń enshisinde. Qazaqstan keleshekte álemdik azyq-túlik qaýipsizdigin qamtamasyz etýde óziniń tabıǵı resýrstaryna saı, laıyq ornyn alady dep senemiz. Osy maqsatta qyzmet etemiz», - dedi "Jastar resýrstyq ortalyǵy" basshysy Amalbek О́mirtaı.
Jastar eki kún boıy naǵyz aýyl ómirin sezindi jáne ózderiniń eńbekke qabilettilikterin dáleldedi. Nátıje boıynsha, "Qarataý" komandasy III oryn, al "Alataý" II oryndy ıelendi, I oryndy "Syrdarııa" quramasy enshilep, Bas júldeni "Turan" toby ıelendi. Jeńimpaz jastarǵa alǵys hat pen baǵaly syılyqtar tabystaldy.