Bıyl kóktemde 4 mln 51 myń gektar alqapqa dán ekken Qostanaı oblysynyń dıqandary oraq naýqanyn tabysty aıaqtap, ortasha eseppen ár gektardan 10,2 sentner astyq jınap aldy. Aýyl sharýashylyǵy basqarmasynyń málimetinshe, oblys qambasyna 4,1 mln tonna astyq túsken.
Alaıda aımaqta kúzgi jıyn-terin naýqany tolyq aıaqtala qoıǵan joq. Bıyl oblysta alqaptardy ártaraptandyrý maqsatynda maıly daqyl kólemi 700 myń gektarǵa ulǵaıǵan. Máselen, Fedorov aýdanynda 82 myń, Meńdiqara aýdanynda 72 myń, al Sarykól jáne Uzynkól aýdandarynda jalpy kólemi 174 myń gektarǵa kúnbaǵys, burshaq, júgeri, zyǵyr, raps sııaqty maıly daqyldar egilgen. Tehnıkasy tolassyz jumys istep jatqan dıqandar kúzgi kempirshýaqtyń ár sátin tıimdi paıdalanyp, baǵaly daqyldy shyǵynsyz jınap alýdyń qamynda.
Búginde tehnologııasy ozyq aldyńǵy qatarly birqatar iri sharýashylyqtar jıyn-terin jumystaryn tolyq aıaqtap, tehnıkasyn qańtaryp, eńbek maıdanynan oralǵan kombaın, traktorlaryn maılap, jóndeý jumystaryn bastady. Aýyl sharýashylyǵy basqarmasy mamandary búginge deıin maıly daqyldyń 83%-y, ıaǵnı 528 myń gektar ónim jınalyp alynǵanyn aıtady. Endi alqapta orylyp bitpegen kúnbaǵys qana qaldy. Daqyldyń bul túrin jınaýǵa kún raıynyń sýytýy esh kedergi keltirmeıdi.
Oblys sharýashylyqtary bıyl 11,6 myń gektar alqaptan jarma daqylyn jınap aldy. Onyń 9,3 gektaryn tary, qalǵanyn qaraqumyq alady.
Qostanaı oblysy