29 qazanda elimizge tanymal advokat jáne quqyq qorǵaýshy, Sybaılas jemqorlyqqa qarsy is-qımyl Agenttigi Tóraǵasynyń shtattan tys keńesshisi Aıman Ýmarova "Adal kómek" jobasy sheńberinde jáne Sybaılas jemqorlyqqa qarsy qyzmettiń ókili Sabırbaev Danııar Semeı qalasynyń servıstik ákimdiginde óńir halqynyń áleýmettik osal toptary úshin tegin zań keńesin ótkizdi, dep habarlaıdy Egemen.kz.
Advokat Aıman Ýmarovamen kezdesýde óńir turǵyndary "halyq zańgerine" óz alǵystaryn bildirip, atalǵan jobanyń qajettiligi týraly aıtty. Konsýltasııalar onlaın rejıminde de, oflaın formatta da ótti. Barlyq suraqtarǵa tıisti jaýaptar men usynystar berildi.
Tájirıbe kórsetkendeı, azamattardyń kópshiligi ózderiniń quqyqtary buzylǵan kezde kimmen baılanysatyndyǵyn, qaı memlekettik organnyń quzyretine onyń suraqtary kiretinin jáne shaǵym berý tártibin bilmeıdi. Biraq ótinishtiń qaralý nátıjesi hattyń durys daıarlaǵanyna jáne tıisti organǵa joldaýyna baılanysty.
Osyǵan baılanysty, "Eriktiler jyly" aıasynda sybaılas jemqorlyqqa qarsy is-qımyl Agenttiginde (Sybaılas jemqorlyqqa qarsy qyzmet) "Adal kómek" jobasy iske qosyldy, onyń maqsaty azamattardyń quqyqtyq saýattylyǵyn arttyrý, sondaı-aq ómirlik mańyzdy máselelerdi sheshý úshin halyqtyń áleýmettik osal toptaryna quqyqtyq kómek kórsetý bolyp tabylady.
Volonter retinde Agenttik qyzmetkerleri, tájirıbeli zańgerler, advokattar, notarıýstar, sondaı-aq stýdentter, magıstranttar, doktoranttar, JOO zań fakýltetteriniń oqytýshylary halyqqa ózderin qyzyqtyratyn máseleler boıynsha turaqty negizde tegin keńes beredi.
Is-sharada advokat sondaı-aq Qazaqstandaǵy AQSh Elshiliginiń qoldaýymen elimizde zańger Aıman Ýmarovanyń quqyqtyq onlaın-mektebi jumys isteıtinin, onda qazaqstandyqtar úzdik zańgerlerdiń tegin onlaın-konsýltasııalaryn ala alatynyn aıtty.