Senat Spıkeri Máýlen Áshimbaevtyń tóraǵalyǵymen Palata otyrysy ótti, dep habarlaıdy Egemen.kz Parlament Senatynyń baspasóz qyzmetine silteme jasap.
Otyrys barysynda senatorlar "Qazaqstan Respýblıkasynyń memlekettik shekarasyn kúzetý jáne ulttyq qaýipsizdik máseleleri boıynsha keıbir zańnamalyq aktilerge ózgerister men tolyqtyrýlar engizý týraly" zańdy qabyldady.
Máýlen Áshimbaevtyń aıtýynsha, memlekettik shekara – ulttyq qaýipsizdigimiz ben eldigimizdiń kepili. Bul zań ulttyq qaýipsizdik organdarynyń basqarý qyzmetin ońtaılandyrýǵa múmkindik beredi. Sondaı-aq, ınfraqurylymdy damytý jáne arnaıy tehnıkalardy qoldaný arqyly memlekettik shekarany kúzetý men qorǵaý júıesin jetildirýge jol ashady.
"Zańda mańyzdy normalar qarastyryldy. Olar Prezıdentimizdiń memlekettik shekaranyń myzǵymastyǵyn qamtamasyz etý jónindegi tapsyrmalaryn iske asyrýǵa arnalǵan. Qazirgi tańda álemde túrli syn-qaterlerdiń týyndap jatqanyn kórip otyrmyz. Sondyqtan shekarany ýaqyt talabyna saı kúzetýdiń jáne qorǵaýdyń myqty júıesin qalyptastyrýdyń mańyzy zor. Osy oraıda búgin qabyldanǵan zań ulttyq qaýipsizdik organdary men shekara qyzmetiniń tıimdiligin arttyrýǵa, shekaramyzdyń beriktigin qamtamasyz etýge qyzmet etedi dep senemiz", dedi Senat Tóraǵasy.
Sonymen qatar senatorlar "Keme qatynasy týraly kelisimdi ratıfıkasııalaý týraly" zańdy qabyldady. Senat Tóraǵasy bul qujattyń Eýrazııalyq ekonomıkalyq odaqqa múshe memleketterdiń baılanysyn nyǵaıtýǵa, kóliktik ınfraqurylymdy damytýǵa jáne taýar aınalymyn arttyrýǵa septigin tıgizetinin atap ótti.
"Qazaqstandyq flottyń ashyq teńizderge shyǵýy úshin osy kelisim men zańnyń strategııalyq mańyzy bar. Bul qujat aldaǵy ýaqytta Reseıdiń ishki sý joldary arqyly Qara jáne Jerorta teńizińderindegi porttarǵa deıin tasymaldanatyn júk kólemin ulǵaıtýǵa múmkindik beredi. Sol arqyly el ekonomıkasynyń órkendeýine yqpal etedi", dedi Máýlen Áshimbaev.
Odan bólek, otyrysta depýtattar "Qazaqstan Respýblıkasynyń Úkimeti men Belarýs Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkasııalaý týraly" zańdy qabyldady. Osy kelisim aıasynda memleketter azamattardyń kóshi-qony, kóshi-qon zańnamasynyń buzylýy jáne zańsyz kóshi-qon joldary týraly aqparattardy, sondaı-aq, elderdiń biriniń aýmaǵynda turýǵa negizdemesi bar tulǵalardyń quqyqtyq mártebesi jónindegi málimetterdi almasýǵa múmkindik alady.
Otyrys kezinde senatorlar tıisti memlekettik organdarǵa birqatar depýtattyq saýal joldady. Álı Bektaev óz saýalynda Túrkistan qalasynyń ınfraqurylymyn damytýǵa qarajat bólý máselesin kóterse, Ábdáli Nuralıev Jambyl oblysy turǵyndarynyń tabysyn arttyrýǵa qatystyjobanyń ekinshi kezeńin qarjylandyrýǵa nazar aýdardy. О́z kezeginde depýtat Aqylbek Kúrishbaev otandyq joǵary oqý oryndarynyń jumysyndaǵy túıtkilderge toqtalyp ótti. Al Álimjan Qurtaev Túrkistan qalasyndaǵy Halyqaralyq týrızm jáne meımandostyq ýnıversıtetin jabdyqtaýǵa jáne Qajymuqan Muńaıtpasovtyń 150 jyldyǵyna arnalǵan memorıaldy keshen qurylysyna qajetti qarajat bólý máselesin sóz etti. О́z saýalynda senator Andreı Lýkın azamattardy áleýmettik qorǵaý jáne jumyspen qamtý máselelerine, sondaı-aq, jumyssyzdyqpen kúres sharalaryna basa mán berdi. Al Baqytjan Jumaǵulovtyń saýalynda oqýlyqtardyń sapasyn arttyrý kerektigi keńinen aıtyldy.