Jambyl oblysy TOBJ-ben tolyq qamtylady

«TOBJ tehnologııasyn qoldana oty­ryp Qazaqstan Respýblıkasynyń aýyldyq eldi mekenderi keń jolaqty ınternetpen qamtý» respýblıkalyq jobasyna sáıkes, Áýlıeata óńirindegi josparlanǵan 72 aýyldyń 67-sine talshyqty-optıkalyq baılanys jelileri tartyldy. Kompanııanyń baspasóz qyzmeti habarlaǵandaı, josparlanǵan 223 memlekettik mekeme men bıýdjettik uıymdardyń 204-i joǵary jyldamdyqty ınternetke qosyldy.

Jambyl oblysyna tartylatyn tal­shyqty-optıkalyq baılanys jelileriniń jalpy uzyndyǵy 912 shaqyrymǵa teń. Jobany júzege asyrý arqyly oblystyń 10 aýdanyndaǵy shalǵaı aýyldar joǵary jyldamdyqty ınternetpen qamtamasyz etiledi.

– Búgingi tańda Qordaı óńiriniń Úlken­sulýtór, Sulýtory, Qalǵuty aýyl­darynda, sondaı-aq Baızaq aýdany­nyń Qumjota jáne Úlgili aýyldarynda jumys aıaqtalýǵa jaqyn qaldy. Qarasha aıynyń sońyna deıin osy aýyl­dardaǵy qalǵan 19 memlekettik organ talshyqty-optıkalyq baılanys jelilerine qosylady. Bul óńirler taý-tas­ty bolyp keledi, sol sebepti jer bederi jumysty ájepteýir qıyndatty. Mysaly, Qordaı óńirinde talshyqty-optı­kalyq baılanys jelileriniń qury­lysy taýdyń boıymen ótedi. Biraq qıyndyqtarǵa qaramastan, jobany bel­gilen­gen merzimde aıaqtaımyz, – deıdi «Qazaqtelekom» AQ Ońtústik aımaqtyq tele­kommýnıkasııa dıreksııasy Jambyl MTBT jelilik-tehnıkalyq bóliminiń bastyǵy Shaıhıslam Qaraqulov.

Baızaq aýdany – oblys ortalyǵyna jaqyn ornalasqan, biraq osyǵan deıin munda ınternet sapasy syn kótermeıtin. Madımar aýyly Baızaq aýdanynyń shalǵaı jatqan aýyldarynyń biri, búginde munda 2002 turǵyn tirkelgen. Aýylda mektep, ákimdik, dárigerlik ambýlatorııa bar. TOBJ tartylǵanǵa deıin bul uıymdar magıstraldyq telekommýnıkasııalyq habtarǵa jyl­dam­dyǵy tómen radıorelelik baılanys jelileri arqyly qosylyp kelgen. Bul tehnologııanyń memlekettik organdarǵa joǵary jyldamdyqty baılanys berýde múmkindigi tym shekteýli edi.  Búgingi tańda keń jolaqty ınternetke qol jetkizgen aýyl ómir sapasynyń da aıtarlyqtaı artty. Mysaly, Shoqan Ýálıhanov atyndaǵy aýyl mektebinde joǵary jyldamdyqty ınternet qos­qannan beri muǵalimder mardymsyz baılanysty umytyp, bilim berý júıesiniń elektrondy platformalaryn emin-er­kin paıdalanýǵa kóshti. Osy  mektep dırektorynyń mindetin atqarýshy Jaq­sylyq Taıshybekovtiń aıtýynsha, pan­demııanyń bilim salasyna engizgen ózgeristeri kezinde aýyldyq mektepter ásirese júırik ınternetke zárý boldy. 

– Oqý jyly bastalar kezde mektebimizge joǵary jyldamdyqty ınternet keldi. Bul óte ýaqtyly jasalǵan sharýa boldy, óıtkeni bıylǵy oqý maýsymynda bastaýysh synyptardan basqasy, oqý jylyn qashyqtan oqyp jatyr. Búginde bizdiń muǵalimder qalalyqtarmen teńesip, óz jumysynda «Kúndelik», Daryn.online, Bilimland.kz sııaqty platformalardy paıdalanýda, bul oqý prosesin áldeqaıda tartymdy ári tıimdi etti, – dedi Jaqsylyq Taıshybekov.

Madımar aýylynyń dárigerlik ambýlatorııasy da keń jolaqty ınternetke qosyldy, dárigerler men mamandar medısınalyq aqparattyq júıelerge qol jetkizip, qaǵazsyz qujat aınalymy­na aýysýda, sonymen qatar telemedı­sına arqyly medısınalyq aqparat alý múmkindigi týdy. Ýchaskelik medbıke Janar Ábildaeva pasıentter týraly máli­metterdi elektrondy medısınalyq kartaǵa engizý jáne dárigerlerdiń qabyl­daýyna jazýdyń qanshalyqty yńǵaıly ári jyldam bolǵanyn atap ótti.

TOBJ jobasy memlekettik organdar úshin de mol múmkindikterge jol ashty. Jergilikti turǵyndarǵa memlekettik qyz­metterdi jedel júrgizý múmkin boldy. Máselen, Yntymaq aýyldyq okrýgi ákimi­niń apparatynda segiz kompıýter «optıkaǵa» qosylǵan.

Turaqty ári jyldam ınternettiń arqasynda qyzmetkerler e-gov, e-Halyk,­ E-Kyzmet aqparattyq júıe­­lerin, bir­yń­ǵaı muraǵatty paıdala­nady. Ha­lyq­qa ózin-ózi qyzmet etý bu­ry­shy uıym­dastyryldy, munda aýyl tur­ǵyndary 28-ge jýyq sertıfıkattardy derbes ala alady, bul ýaqyt pen resýrstardy únemdeýge óte yńǵaıly.

«Optıkaǵa» qosylý núkteleriniń kóbeıýi keleshekte «250+» jobasy aıasynda aýyldyq jerlerde 3G / 4G uıaly baı­lanysynyń mobıldi jelilerin damytýǵa múmkindik beredi, bul shalǵaı aýyldardyń turǵyndaryna keń jolaqty mobıldi Internetke qol jetkizýge jol ashady.