Jyl saıyn joǵary oqý oryndarynyń rektorlary qarjylyq-sharýashylyq qyzmet pen ǵylymı-zertteý, oqytý jumystary jóninde halyq aldynda esep beredi, dep habarlaıdy Egemen.kz
Bul týraly búgin Bilim jáne ǵylym vıse-mınıstri Mıras Dáýlenov Ortalyq kommýnıkasııalar qyzmetindegi brıfıngte eske saldy.
"JOO-lardy tórt sanat boıynsha saralaý mańyzdy baǵyt bolyp otyr. Bul – halyqaralyq tájirıbe. Bul joǵary oqý oryndarynyń qandaı deńgeıde ekenin túsinýge qajet. JOO-lardy saralaý negizinde túlekterdi jumysqa ornalastyrý deńgeıi, eldiń, óńirdiń, qandaı da bir salanyń damýyna qosqan úlesi bolady, osylaısha akademııalyq derbestik birte-birte keńeıedi", dep túsindirdi vıse-mınıstr.
Vıse-mınıstrdiń aıtýynsha, ekinshi mańyzdy nárse – JOO-lardyń basqarý derbestigin qamtamasyz etý. Osy baǵyttaǵy jumys túbegeıli qaıta quryldy. Endi JOO-lar alqalyq basqarý organdaryn, formalaryn aıqyndaı alady jáne zańdy turǵyda olardyń naqty túrlerin, basqarý organdaryn aıqyndaý shektelmeıdi.
"Joǵary bilim sapasyna qoıylatyn talaptardy arttyramyz. Iаǵnı, bizdiń tarapymyzdan joǵary bilim berý júıesi memlekettik standarttar, JOO qyzmetiniń úlgilik erejeleri arqyly retteledi. Osyǵan baılanysty biz jyl saıyn JOO rektorlary oqý ornynyń qarjylyq-sharýashylyq qyzmeti, ǵylymı-zertteý jáne oqý jumystary boıynsha jurtshylyq aldynda esep beretinin kózdep otyrmyz. Bul "halyq únine qulaq asatyn memleket" tujyrymdamasyndaǵy óte mańyzdy sát. Taǵy bir aıta keterligi – sheteldik joǵary oqý oryndaryndaǵy bilim alýshylar memlekettik tapsyrys berilgen nemese halyqaralyq akkredıtasııasy bar joǵary oqý oryndaryna aýystyrylady. Bul da bilim sapasyn arttyrýǵa baǵyttalǵan", dedi M.Dáýlenov.