SQO saıttardyń birindegi "jańa tanysý" Petropavldyń 65 jasar turǵyny úshin jaısyz aıaqtaldy, dep habarlaıdy Egemen.kz.
Zeınetker osyndaı saıttardyń birine tirkelip, óziniń saýalnamasyn qaldyrǵan. Kóp uzamaı boıjetken habarlasyp, ekeýi hat almasqan. Jańa tanysy zeınetkerge kınoǵa barýdy usynyp, Petropavl qalasy Internasıonal kóshesi, 66 úıde ornalasqan jalǵan "Kvadrofilms" saıtynyń mekenjaıyn jibergen. Ol taǵy kúnin, kıno bolatyn zaldy jáne seanstyń ýaqytyn aldyn ala tańdaýǵa bolatynyn aıtyp túsindirgen. Saıtqa ótken qart óz kartochkasynyń derektemelerin qaldyrǵan. Biraz ýaqyttan soń "kınoteatr operatory" hat jazyp, telefonyna kelgen kodty aıtýyn suraıdy. Ony aıtyp bergennen keıin zeınetker óziniń alaıaqtardyń arbaýyna túsip qalǵanyn jáne kartochkasynan 118 myń teńge aqshasynan aırylǵanyn bir-aq kóredi.
"Qaskóıler "jeke tulǵalarǵa arnalǵan ınternet-bankıng" jáne "SMS-parolderdi jetkizý" servısterin paıdalaný arqyly aqshany jábirlenýshiniń shotynan basqa shotqa aýdarǵan", deıdi SQO Polısııa departamenti Krımınaldyq polısııa basqarmasynyń bastyǵy, polısııa polkovnıgi Petr Klımov.
Ol qandaı jaǵdaı bolmasyn eshkimge jeke derekter týraly aıtpaýdy eskertti.
PETROPAVL