Petropavl qalasynda ózine senip kiltin tastap ketken 19 jasar bozbalanyń úıinen baǵasy 137 myń teńge turatyn "Acer" teledıdaryn urlap, ony lombardqa ótkizgen 1998 jyly týǵan ury ustaldy, dep habarlaıdy Egemen.kz.
Atalǵan fakti sotqa deıingi tergep-tekserýdiń biryńǵaı tizilimine Qylmystyq kodekstiń 188-baby - "Urlyq" boıynsha engizildi. Kúdiktige qatysty mindetti kelý túrindegi májbúrleý sharasy taǵaıyndaldy.
"Páter urlyǵyn boldyrmaý úshin biz qala turǵyndaryna úıdiń qorǵalýyn kúsheıtýge keńes beremiz, ıaǵnı myqty qulyptar qoıyp, múmkin bolsa úı podezderine domofondar men beıne baqylaýdy ornatý qajet, páter men úılerdi dabyl júıesimen jabdyqtaǵan jón", deıdi SQO Polısııa departamenti Krımınaldyq polısııa basqarmasynyń bastyǵy, polısııa polkovnıgi Petr Klımov.
Jyl basynan SQO-da 132 páter urlyǵy tirkeldi. Qazirgi ýaqytta 95-i boıynsha prosessýaldyq sheshim qabyldandy.
PETROPAVL