SQO polıseıleri kámeletke tolmaǵandar tarapynan jáne olarǵa qatysty quqyq buzýshylyqtyń aldyn alý jumystaryn kanıkýl kezinde jandandyra tústi, dep habarlaıdy Egemen.kz.
Jastar kóp jınalýy múmkin degen oryndarda reıd júrgizilýde. Jalǵa beriletin páterler men kottedjder erekshe nazarda boldy. Polıseılermen birge Petropavl qalasy prokýratýrasynyń, bilim berý uıymdarynyń, onyń ishinde qorǵanshylyq jáne qamqorshylyq organdarynyń ókilderi, Kámeletke tolmaǵandardyń isteri jáne olardyń quqyqtaryn qorǵaý jónindegi komıssııanyń hatshysy qoıan-qoltyq jumys jasady. Atalǵan jumys "Demalys" jedel-profılaktıkalyq is-sharasy aıasynda 11 qarashadan bastap kúsheıtildi. JPISh alǵashqy kúni 17 otbasy tekserilip, 4 ákimshilik hattama toltyryldy.
Reıd kezinde segizinshi jáne altynshy synyptyń eki oqýshysynyń alkogoldik ishimdik ishý áreketi anyqtaldy. Jasóspirimdermen jáne olardyń ata-analarymen profılaktıkalyq áńgime júrgizildi. Keıbir ata-analardyń jaýapkersizdigi qaýiptiliktiń taǵy bir faktory bolyp tabylady. 11 qarashada Kámeletke tolmaǵandardyń isteri jónindegi komıssııa 35 jastaǵy áıel men 29 jastaǵy birge turatyn adamyna qatysty ıývenaldyq polısııa jınaǵan materıaldy qarastyrdy. 5 aılyq balasy bola tura ekeýi de jumys istemeıdi, ishimdikti asyra paıdalanady. Er adam týysynyń úıinde turǵanda masań kúıde janjal shyǵarǵany úshin úıden qýylǵan. Qolynda balasy bar olar qaraýsyz qalǵan avtokóliktiń salonynda túnep shyqqan. Komıssııa bóbektiń taǵdyryn sheshti: ol Sábıler úıine jiberildi. Ata-analar ishimdikten bas tartýǵa, jumysqa ornalasyp, turǵyn úı máselesin sheshýge ýáde berdi. Ýádelerin oryndamaǵan jaǵdaıda ata-ana quqyǵynan aıyrý máselesi qaralatyn bolady. Osyndaı jaǵdaılardy boldyrmaýǵa baǵyttalǵan turmysy tómen otbasylardy tekserý júrgizildi.