Elimizdiń teristigi bıyl jaman indet tejeý bolǵanyna qaramastan, ótken jyldyń sáıkes merzimimen salystyrǵanda ekonomıkanyń damý ósimin saqtap qaldy. Bıylǵy 10 aıdyń qorytyndysy boıynsha ótken jylmen salystyrǵanda negizgi kapıtalǵa salynǵan ınvestısııa kólemi 19,9 paıyz, turǵyn-úılerdi paıdalanýǵa berý 12,5 paıyz, qurylys 10,4, ónerkásip 5,5, aýylsharýashylyq ónimderiniń óndirisi 3 paıyzǵa artyp otyr. Bul týraly oblys ákimdiginiń 10 aıdyń qorytyndysyn qaraǵan otyrysynda aıtyldy.
Sonyń ishinde aýyl sharýashylyǵy ónimderiniń jalpy kólemi on aıda 700,8 mlrd teńgege jetken, al byltyr jyl boıynda ol 612 mlrd teńge bolǵan edi. О́sim ósimdik ónimderiniń kólemi 3,4 paıyzǵa artqandyǵynyń jáne mal sharýashylyǵy ónimderiniń 1,8 paıyzǵa artqandyǵynyń esebinen bolyp otyr. Árıne, bul jerde bıylǵy baǵanyń byltyrǵymen salystyrǵanda joǵary ekenin de esepke alǵan jón. Degenmen ósim aıtarlyqtaı. Sonyń ishinde Tımırıazev aýdanynyń aýylsharýashylyq ónimderiniń ósimi tipti 19,6 paıyzǵa, Shal aqyn aýdanynyń qarqyny 18,8 paıyzǵa artqan.
Mal sharýashylyǵy ónimderiniń arasynda et jáne et ónimderiniń artýy oblys boıynsha 4,1 paıyz, al sút ónimderiniń artýy 5,4 paıyz boldy. Sońǵylarynyń artýyna sút fermalarynyń paıdalanýǵa berilýleri áser etip otyr. Oblys ákimi Qumar Aqsaqalovtyń ózi osyndaı fermalardyń kóbeıýin qatań baqylaýǵa alǵan.
– Biz endigi jyly Taıynsha aýdanynda 3 myń bas sıyrǵa arnalǵan sút fermasyn paıdalanýǵa beremiz. Bul bizdiń oblys qana emes, elimizdegi asa iri sút fermasy bolmaq, – dedi ol otyrysta sóılegen sózinde.
Sonymen qatar oblys aýdandary arasynda tek Jambyl aýdanynda ǵana sút fermasy áli kúnge salynbaǵanyn atap ótip, aýdan ákimine osy máseleni qarastyrý týraly naqty tapsyrma berdi.
Aýyl sharýashylyǵy ónimderiniń arasynda tek jumyrtqa alý ǵana byltyrmen salystyrǵanda 23 paıyzǵa deıin tómendep ketken. Bul bıylǵy kúzde tumaý kelip, qustyń jappaı qyrylǵandyǵynyń kesirinen bolyp otyr.
Et óńdeý de bıyl byltyrdyń sáıkes merzimimen salystyrǵanda 4,1 paıyzǵa ulǵaıdy. Bul «Mıasokombınat» JShS, «Leontev» JShS jáne taǵy basqalarynyń esebinen qol jetkizilgen tabys. Et konservileý qarqyny da byltyrǵymen salystyrǵanda 28 paıyz artty. Jalpy alǵanda, bıyl aımaqta 1300 tonna et ónimderi shyǵarylǵan eken.
Maıly daqyldarmen de oblys dıqandary jergilikti turǵyndardy tolyǵymen qamtamasyz ete alady. Olardyń da úlesi bıyl byltyrǵyǵa qaraǵanda artqan. Aýylsharýashylyq salasy boıynsha qorytyndy sózinde Qumar Aqsaqalov barlyq aýdan ákimderine bıylǵy oraqqa tııanaqty sarap jasap, eńbek ónimdiligin arttyra almaǵan sharýalardyń jerin alý máselesin qarastyrýdy usyndy. О́ıtkeni olar jańa tehnologııalardy qoldanbaı, tyńaıtqysh seppeı, tuqym sapasyn arttyrmaı otyr. Jerdi tozdyryp, tek ónim alýdy ǵana kókseıtin mundaı sharýalarǵa tıisti sharalar qoldanylýy kerek dedi ákim.
О́nerkásip ónimderiniń jalpy quny bıylǵy 10 aıda 235,6 mlrd teńgeni qurap, byltyrǵy jyldyń sáıkes merzimimen salystyrǵanda 5,5 paıyzǵa artqan. Al taý-ken óndirisiniń ósimi 13 paıyzǵa deıin jetken. О́nerkásip ónimderiniń ósimi boıynsha Esil men Jambyl aýdandary alda keledi. Petropavl qalasynyń ózindegi negizgi zaýyttar turaqty túrde tapsyrystarmen qamtamasyz etilgen. Tapsyrys portfeliniń eki ese artqandyǵyn aıryqsha atap ótýge bolady. Sonyń ishinde ZIKSTO zaýyty úshin «Qazaqstan temir joly» Ulttyq kompanııasynan 2 myń vagon daıyndaý týraly tapsyrysqa qol jetkizý – úlken tabys.
– Kelissózderdiń qanshalyqty qıyndyqpen júrgizilgendigin aıtpaı-aq qoıaıyn, áıteýir biz úlken oljaǵa qol jetkizip, oblys úshin orasan zor tapsyrys aldyq», dedi ákim. Bul tapsyrystyń quny 45 mlrd teńge. Endi atalmysh kásiporyn jyl boıy tolyq kúshinde jumys istep, jumysshylarynyń áleýmettik ahýalyn, salyq tóleýdi arttyrady. Qazirdiń ózinde alǵashqy qarjylandyrýlar túsip otyr. Aldymyzdaǵy jyldyń sáýir aıynan bastap osy zaýyt jumysshylarynyń eńbekaqysy 20 paıyzǵa artatyndyǵy kózdelgen.
Sondaı-aq «Kırov zaýyty», «Munaımash», «Poısk» kásiporyndary da ózderiniń ónimderin byltyrmen salystyrǵanda ájeptáýir arttyrǵan. «Sonyń ishinde «Kırov zaýyty» kásiporny joǵary tehnologııaly IT ónimder shyǵarady degende jurttyń bári skeptıkalyq kózqarasta bolǵan edi. Al búgingi tańda osy zaýyt 5 myń dana kompıýter, 19,5 myń dana noýtbýk, 8 myń dana planshet shyǵaryp, 3,8 mlrd teńgeniń ónimderin óndirýge qol jetkizdi. Onyń ónimderine degen tapsyrystar kórshiles Aqmola, Qostanaı, Túrkistan oblystarynan da túsip otyr», dedi Qumar Irgebaıuly.
Qurylystyń ósimi 10,4 paıyzǵa deıin artyp, bıylǵy on aıda 79,9 mlrd teńgeni qurap otyr. Bul sala boıynsha Petropavl qalasynan basqa Ýálıhanov, Tımırıazev, Shal aqyn aýdandary alda keledi. Turǵyn-úılerdi paıdalanýǵa berý boıynsha bıylǵy 10 aıda 29,8 paıyz ósim bolǵan. Ázirge 112,5 myń sharshy metr turǵyn úı paıdalanýǵa berilgen. Jyldyń aıaǵyna deıin bul san arta túsedi. Sondaı-aq kirpish, propılen jáne basqa da qurylys materıaldaryn shyǵarý da oblys boıynsha artyp otyr.
Osylaısha Soltústik Qazaqstan oblysy jaman indetti elemeı, ekonomıkada joǵary tabystarǵa jetip otyr.
Soltústik Qazaqstan oblysy