Jańa oqý jyly bastalǵannan beri kezekshi synyptarda bilim alyp jatqan 302 oqýshy COVID-19 ınfeksııasyn juqtyrǵan. Qazirgi tańda Qazaqstan boıynsha 456 bala koronavırýstan emdelip jatyr. Bul týraly Prezıdent janyndaǵy ortalyq kommýnıkasııalar qyzmetinde II toqsanǵa qatysty ótken brıfıngte aıtyldy.
Jıynda birinshi bolyp sóz alǵan Bilim jáne ǵylym vıse-mınıstri Rústem Bıǵarı 16 qarashada mektepterde II toqsannyń bastalǵanyn aıta kelip, aldymen I toqsannyń nátıjelerine qysqasha toqtaldy.
«I toqsanda mıllıonnan asa bala aralas formatta bilim aldy. 2,3 mln bala qashyqtan oqydy. Aıta keteıin, 82 mln-nan asa baǵa onlaın rejimde qoıyldy, 40 mln-ǵa jýyq úı tapsyrmasy men baqylaý jumysy berilgen. Bilim berý júıesinde 2 mln-nan asa ata-ana, 3 mln bilim alýshy jumys istedi. Sonymen qatar sabaqty ótkizýdiń qosymsha tásilderiniń biri retinde vıdeo sabaqtar qoldanyldy», dedi R.Bıǵarı.
Brıfıngte belgili bolǵandaı, Qazaqstan aýmaǵynda koronavırýs ınfeksııasynyń aldyn alý men taralýyna jol bermeý jónindegi vedomstvoaralyq komıssııasy, sondaı-aq Bas memlekettik sanıtarlyq dárigerdiń qaýlysy negizinde oqytý formaty anyqtaldy. Birinshiden, mektepaldy, 1-4 synyp oqýshylarynyń kezekshi synyptaryna 5-synyp qosyldy. Ekinshiden, kontıngenti 5-300 oqýshyny quraıtyn mektepterge shtattyq rejimde oqytýǵa ruqsat berildi. Úshinshiden, halyqaralyq mektepterde 1-7 synyptar dástúrli formatta oqytýǵa kóshirildi.
«Jasyl aımaqtaǵy óńirlerde nelikten oqytýdy dástúrli formatqa kóshirmeske?» degen saýalǵa atalǵan baspasóz jıynynda Qazaqstannyń Bas sanıtar dárigeri Aıjan Esmaǵambetova:
«Normatıvtik-quqyqtyq aktilerde jazylǵan jáne KVI taralýynyń aldyn alýǵa baǵyttalǵan erejeler mektepterde saqtalmasa, bári beker. Mekteptegi balalar osy talaptardyń barlyǵyn oryndaıtynyna sený óte qıyn desem, barlyǵy kelisetin shyǵar. Klımattyq jaǵdaılarǵa qaraı jeldetý úshin barlyq jaǵdaılardy jasaý da keıde múmkin emes. Kóp jerde terezeler ashylmaıdy. Bul jaǵdaıda ventılıasııa jumysy qaýipsiz aýa almasýdy qamtamasyz ete alady. Jeldetý – aldyn alý sharalarynyń biri, alaıda ony jylytý maýsymyna baılanysty saqtaý qıynnyń qıyny. Osy sharalardyń barlyǵyn jáne kórsetkishterdi eskere otyryp, dástúrli oqytýǵa aýysý nemese aýyspaý týraly sheshim qabyldanady. Sonymen qatar naqty eldi mekendegi epıdemııalyq jaǵdaıǵa baılanysty da óńirdiń bas sanıtarlyq dárigeri ruqsat berýi múmkin», dep jaýap berdi.
Al úshinshi spıker, Mektepke deıingi jáne orta bilim komıtetiniń tóraıymy Maıra Meldebekova ata-analardan túsken toqsandyq jıyntyq baǵalaý (TJB) bólim boıynsha jıyntyq baǵalaýdyń (BJB) qıyndyǵyna qatysty shaǵymdarǵa:
«Tehnıkalyq erekshelikter boıynsha baǵalaý júıesin tikeleı pán muǵalimi daıyndaıdy. Jalpy, biz ádistemelik usynystarda kóp tapsyrma bolmas úshin naqty ýaqyt pen kúrdelilikti belgiledik. Bastaýysh synyptarda 1-2 tapsyrma beriledi. Eger bul mektep qashyqtan oqıtyn bolsa, onda BJB men TJB aqparattyq júıeler nemese «Kúndelik.kz», sondaı-aq «Daryn onlaın» nemese «Bilim Land» sekildi basqa da platformalar arqyly ótkizilýi múmkin. Keri baılanys úshin qandaı aqparattyq júıeni qoldansa, sony BJB jáne TJB úshin de paıdalanýǵa bolady. Al tapsyrmalardyń naqty kólemi kórsetilgen. Sondyqtan muǵalimder bul kólemdi tikeleı ustanýy kerek jáne tapsyrma kúrdeli bolmaýy tıis», dedi.
Qosa keteıik, II toqsandaǵy bólim men toqsan úshin jıyntyq baǵalaýdy ótkizý merzimin mınıstrlik belgilep, bekitkennen keıin mektepterge jiberedi.