Shymkent qalasynyń ákimi Murat Áıtenov "Ońtústik" telearnasynda tikeleı efırde ótetin kezekti "Ákim saǵaty" baǵdarlamasyna qatysyp, turǵyndardyń saýaldaryna jan-jaqty jaýap berdi, dep habarlaıdy Egemen.kz ákimdiktiń baspasóz qyzmetine silteme jasap.
"Ákim saǵaty" baǵdarlamasy arqyly qala ákimine tikeleı saýal joldaýǵa bolatyny týraly kórermenderge aldyn ala habarlanǵan bolatyn. Arnaıy Call ortalyq qurylyp, arnanyń resmı saıty men áleýmettik jelilerde paraqshalar arqyly suraqtar qabyldandy. Ákim saǵaty habaryna bıyl ekinshi ret qatysqan qala ákimi Murat Dúısenbekuly aldymen shahardaǵy saqtyq sharalary boıynsha atqarylyp jatqan jumystarǵa toqtalyp ótti.
"Koronavırýs ınfeksııasynyń yqtımaldy tolqynyna úsh ssenarıı boıynsha daıyndaldyq. A – qazirgi jaǵdaı, 1 220 tósek-oryn ázirlengen. V – maýsymdyq epıdemıologııalyq ahýal nasharlasa, tósek-oryn sanyn 4 016-ke deıin arttyramyz. Jaǵdaı kúrdelilenetin bolsa S ssenarıı boıynsha 5 416 tósek-oryn daıyndalady. Qazirgi tańda, Shymkent qalasy atalǵan úsh ssenarııge daıyn", dedi qala ákimi.Turǵyndar tarapynan joldanǵan suraqtardyń basym bóligi densaýlyq, shalǵaı eldi mekenderdegi ınfraqurylym, transport jáne qurylys salasyna qatysty boldy. Sonymen qatar, qala ákimi áleýmettik jeli men Call ortalyqqa kelip túsken suraqtarǵa retimen jaýap berdi.