Keshe Qazaqstan Prezıdentiniń kómekshisi – Qaýipsizdik Keńesiniń Hatshysy Áset Isekeshev beınekonferensııa formatynda ótken Táýelsiz Memleketter Dostastyǵyna (TMD) qatysýshy memleketterdiń qaýipsizdik keńesteri hatshylarynyń VIII otyrysyna qatysty, dep habarlady Aqorda saıty.
Is-sharaǵa Reseı Qaýipsizdik keńesiniń hatshysy N.Patrýshev, Ázerbaıjan Qaýipsizdik keńesiniń hatshysy R.Ýsýbov, Armenııa Qaýipsizdik keńesiniń hatshysy A.Grıgorıan, Qyrǵyzstan Qaýipsizdik keńesiniń hatshysy R.Mýsaev, Tájikstan Qaýipsizdik keńesiniń hatshysy N.Mahmýdzoda, О́zbekstan Respýblıkasy Prezıdentiniń janyndaǵy Qaýipsizdik keńesiniń hatshysy V.Mahmýdov, Túrikmenstan Memlekettik Qaýipsizdik keńesiniń hatshysy Ch.Amanov, Belarýs Qaýipsizdik keńesi memlekettik hatshysynyń orynbasary V.Archakov, Atqarý komıtetiniń tóraǵasy – TMD Atqarýshy hatshysy S.Lebedev, UQShU Bas hatshysy S.Zas qatysty.
Forým barysynda Dostastyq elderindegi búgingi syn-qaterler jaǵdaıyndaǵy yntymaqtastyq máseleleriniń keń spektri qaraldy.
Sonyń ishinde koronavırýs indetiniń taralýyna qarsy kúres pen jańa bıologııalyq qaýipterge qarsy is-qımyl kezindegi memleketaralyq sharalar, aqparattyq keńistikti qorǵaý salasyndaǵy yntymaqtastyq máseleleri, tótenshe jaǵdaılardyń saldaryn eńserý jónindegi ózara is-qımyl, Aýǵanstandaǵy qazirgi ahýal jáne basqa da baǵyttar talqylandy.
Áset Isekeshev óz sózinde aımaqtyq qaýipsizdiktiń eń ózekti máselelerine, TMD elderindegi táýekelder men qaýipterdi azaıtýǵa mán berdi. Atap aıtqanda, koronavırýs indetiniń taralýyna qarsy kúres, sý-ekologııalyq jáne azyq-túlik qaýipsizdigi, kıberqaýipsizdikti qamtamasyz etý, esirtkiniń zańsyz aınalymyna, terrorızm men ekstremızmge qarsy kúreste birlesken jumystardyń qajet ekenine nazar aýdardy.