Soltústik Qazaqstanda Nur Otan partııasy oblystyq fılıalynyń tóraǵasy Qumar Aqsaqalovtyń qatysýymen kezekten tys bolǵan XXXI konferensııasynda Májilis depýtattyǵyna partııalyq tizim boıynsha oblystan enetin kandıdattar anyqtaldy. «Praımerız» júıesimen daýys bergen 150 delegat úsh úmitkerdi tańdady.
«Ata dańqymen qyz óter, mata dańqymen bóz óter» demekshi tańdalǵan úsh kandıdattyń da ákeleri oblys turǵyndaryna jaqsy tanymal jandar edi. Sonyń ishinde «Zenchenko ı K» kommandıttik seriktestiginiń qazirgi bas dırektory G.Zenchenkonyń ákesi Eńbek Eri G.Zenchenko bolsa, «Soltústik» ÁKK AQ basqarma tóraǵasy Esjan Orazalınniń ákesi Qabı men Dmıtrıı Kolodanyń ákesi Vladımır de aýdan ákimi bolǵan, oblysqa belgili adamdar. Biraq bulardyń ózi de oblys halqyna iskerligimen tanylyp júrgen jastar, elimiz óz Táýelsizdigin alǵan jyldarda qalyptasqan tulǵalar. Olar ózderimen talasqa túsken basqa on úmitkerden góri kóp daýys jınaı aldy. О́mirdiń barlyq salasy boıynsha kóterilgen taqyryptarda olar basqalardan ozyq kórindi.
Sonymen birge osy konferensııada Soltústik Qazaqstan oblysynyń máslıhatyna partııalyq tizimmen túsetin úmitkerlerdiń tizimi bekitildi. Olardyń jalpy sany 48 adam boldy. Kandıdattardyń týra úshten biri – áıelder. Sondaı-aq jastardyń úlesi de 21 paıyzǵa jetip otyr. Burynǵy depýtattardyń arasynan 10 adam ǵana jańa quramǵa engizildi.
Kásibı quramyna keletin bolsaq, úmitkerlerdiń eń úlken bóligi, ıaǵnı 27 paıyzy aýyl sharýashylyǵynan, 17 paıyzy kásipkerlikten, jáne 10 paıyzdan artyǵy densaýlyq saqtaý salasynan bolyp otyr.
Konferensııada delegattar Nur Otan partııasynyń aımaqtyq saılaýaldy baǵdarlamasyn da bekitti. Onda damýdyń jeti basymdyǵy naqtylanǵan edi. Sonymen birge delegattar partııanyń HH sezine baratyn delegattardy saılady jáne oblystyq fılıaldyń saıası keńesiniń jańa quramyn bekitti.
Konferensııa bekitken jeti basymdyqtyń arasynda aımaq ekonomıkasynyń damýy, halyqtyń ál-aýqatyn arttyrý, turǵyndar qaýipsizdiginiń artýy jáne t.b. bar. Jalpy, oblys boıynsha bir oblystyq, bir qalalyq jáne 13 aýdandyq saılaýaldy baǵdarlama ázirlengen.
Partııanyń oblystyq fılıaly tóraǵasynyń birinshi orynbasary Ásem Rahmetovanyń aıtýyna qaraǵanda, múshelerden 1150 usynys men pikir túsken. Sonyń ishinde 1088-i saılaýaldy baǵdarlamalaryna baılanysty. Sonyń ishinde 978 usynys saılaýaldy baǵdarlamalarynyń jobalaryna engizilgen. 19 usynys boıynsha sharalar qabyldanýda, al 10 usynystyń sheshimi respýblıkalyq deńgeıge jatatyndyqtan qarastyrylmaǵan. Usynystar men pikirlerdiń negizgi bóligi, ıaǵnı 34 paıyzy kólik pen ınfraqurylym, 25 paıyzy turǵyn úıler men TÚSh, 8 paıyzy bilim berý salasyn qamtyǵan.
Aıta ketetin jaıt, partııalyq konferensııalar barlyq aýdandar men Petropavl qalasyndaǵy fılıaldarda ótkizildi. Oblystyq praımerızge 632 partııa múshesi qatysyp, bir aıdyń ishinde saılaýshylarmen 6500 kezdesý ótkizdi. Oǵan shamamen 125 myńdaı adam qatysty.
Soltústik Qazaqstan oblysy