Bul týraly QR Memlekettik qyzmet isteri agenttiginiń resmı ókili – baspasóz hatshysy Erhan Tatken óziniń Facebook áleýmettik jelisindegi paraqshasynda jazdy, dep habarlaıdy Egemen.kz.
"Memleket basshysy aǵymdaǵy jylǵy 13 qarashada memlekettik qyzmet salasyndaǵy keıbir aktilerge ózgerister engizýdi kózdeıtin Jarlyqqa qol qoıdy.
Osylaısha, elimizde saıası qyzmetshilerdi rotasııalaý ınstıtýty alǵash ret engizildi (buryn rotasııa ákimshilik qyzmetshilerge ǵana qoldanylǵan). Endi, saıası qyzmetshiler atqaratyn laýazymyna taǵaıyndalǵan kúnnen bastap árbir tórt jyl saıyn rotasııalanatyn bolady", dep jazdy Erhan Tatken.
Bul rette tıisti memlekettik organ basshysynyń sheshimi boıynsha saıası qyzmetshiniń atqaratyn laýazymynda bolý merzimi eki jylǵa uzartylýy múmkin. Keıinnen eki jylǵa uzartý Prezıdent janyndaǵy Kadr saıasaty jónindegi ulttyq komıssııanyń sheshimi boıynsha ǵana múmkin bolady.
Osylaısha, saıası qyzmetshilerdiń laýazymda bolýynyń ruqsat etilgen eń uzaq merzimi segiz jyldan aspaıdy.
Agenttiktiń baspasóz hatshysy Erhan Tatkenniń sózinshe saıası qyzmetshilerdi rotasııalaý ınstıtýty 2021 jylǵy 1 qańtardan bastap engiziledi.
Sondaı-aq, osy Jarlyqpen «B» korpýsynyń qyzmetshilerin rotasııalaý tártibine tolyqtyrýlar engizildi. Máselen, ákimdikter basqarmalarynyń basshylaryna óńiraralyq rotasııalaý engizildi (buryn olardy rotasııalaý tek bir ákimdik sheginde ǵana múmkin bolatyn). Bul rette mundaı rotasııa ákimdikterde komandalyq oryn aýystyrýǵa jol bermeý maqsatynda Agenttikpen kelisim boıynsha júrgiziletin bolady.
Budan basqa, sońǵy úsh jyldan kem emes belgili bir basshylyq laýazymdardy atqaratyn, onyń ishinde ártúrli memlekettik organdarda jumys isteıtin «B» korpýsynyń qyzmetshilerin erikti rotasııalaý engizildi. Sonymen qatar, mundaı rotasııa basqa ákimshilik-aýmaqtyq birlikke ǵana múmkin bolady.
Zeınetkerlik jasqa tolǵanǵa deıin úsh jáne odan az jyl qalǵan qyzmetshilerge rotasııadan bas tartý quqyǵy berilgenin atap ótken jón.
"Rotasııanyń negizgi maqsattary memlekettik organdar qyzmetiniń tıimdiligin arttyrý, sybaılas jemqorlyq quqyq buzýshylyqtardyń aldyn alý, sondaı-aq qyzmetshilerdiń kásibı áleýeti men basqarýshylyq tájirıbesin damytý jáne tıimdi paıdalaný bolyp tabylady.
Sondaı-aq, osy Jarlyqpen "B" korpýsynyń qyzmetshilerin memlekettik organdardyń ishinde aýysý tártibimen taǵaıyndaý múmkindigi engizildi.
Sonymen, memlekettik qyzmetkerler memlekettik organ ishindegi ózge de teń dárejeli laýazymǵa, sondaı-aq joǵary turǵan laýazymǵa osy memlekettik organda keminde sońǵy eki jyl tómen turǵan laýazymda ótili bolǵan jaǵdaıda aýysý tártibimen taǵaıyndalýy múmkin.
Bul ózgeris memlekettik qyzmetshilerdiń memlekettik organdar ishinde mansaptyq ilgerileýine yqpal etedi", dedi Erhan Tatken.