Tuńǵysh Prezıdent kúnine oraı D. Serikbaev atyndaǵy Shyǵys Qazaqstan tehnıkalyq ýnıversıtetiniń kitaphanasy zamanaýı jańǵyryp, Tuńǵysh Prezıdent kúni qarsańynda saltanatty túrde ashyldy, dep habarlaıdy Egemen.kz.
Jańartylǵan rýhanııat oshaǵynyń oqý zaly keń, ári kóp fýnksıonaldy. Kitaphana ishi «IDEA-ROOM activity», «Face To Face», «Oqý» jáne «Sıfrlandyrý» aýmaqtaryna bólingen. Stýdentter emin-erkin, eshkimniń kómegine júginbeı-aq kitaphana qoryna qol jetkize alady. О́z betinshe kerek kitaptardy alyp, tirkep, paıdalana beredi. Shyǵaberiste ornatylǵan arnaıy qurylǵynyń arqasynda, kitapty ruqsatsyz alyp ketý múmkin emes.
Saltanatty is-sharada birinshi prorektor Sáýle Rahmetýllına jınalǵan qaýymdy Tuńǵysh Prezıdent kúnimen quttyqtady. Sonymen qatar, kitaphanada kóp jyldar eńbek etken Rıza Begımova jınalǵandarǵa jyly lebizin bildirdi.
- ShQTÝ kitaphanasy respýblıka boıynsha ǵylymı kitaphanalar úzdiginen eshqashan túspegen. Búginnen bastap jańartylǵan formatta bilim alýshylarǵa qyzmet kórsetpek. Zamanaýı jabdyqtarmen qamtamasyz etilip, jastar úshin yńǵaıly etip jasalǵan. «Kitaphana men kitaptarsyz óskeleń urpaqty tárbıeleý múmkin emes dep» Elbasymyz da aıtqan, – dedi kitaphana ardageri Rıza Begımova.
Aıta keterligi, kitaphanaǵa oqyrmandar kóp keletindikten, aýany zararsyzdandyrý úshin bakterısıdti shamdar qoldanylmaq.