Orman shaýashylyǵy jáne janýarlar áleminiń Soltústik Qazaqstan aýmaqtyq ınspeksııasy janýarlar álemi jáne ań aýlaý sharýashylyǵynyń bólim basshysy Oleg Bespalov 28 qarasha kúni Jelıakovo aýyly mańynan ótip bara jatyp, joldyń jıeginde jatqan eki eliktiń etin baıqaıdy.
Mashınasyn jasyryp, ańshylardy kútip almaq bolyp, ýchaskelik polısııa ınspektoryna qońyraý soǵady. Ol dabyl kóterip, jaqyn mańda reıdte júrgen Qyzyljar aýdanynyń PB qyzmetkerleri oqıǵa ornyna shuǵyl jetedi. Kóp keshikpeı elikterdi atqandar ÝAZ avtomobılimen kele qalady. Olar bes adam eken. Júksalǵyshynda taǵy úsh sibir eliginiń eti bólshektep salynypty. Brakonerlerden barlyǵy 3 myltyq, 16 oq-dári, 2 pyshaq alyndy.
«Jedel-tergeý tobynyń jumysy barysynda bólshektenbegen taǵy bir janýardyń eti men myltyq alyndy. Avtomobıl arnaıy turaqqa qoıyldy. Atalǵan fakti Qylmystyq kodeksiniń «Zańsyz ań aýlaý» baby boıynsha Sotqa deıingi tergep-tekserýdiń biryńǵaı tizilimine engizildi. Kúdiktilerge qatysty kelý týraly mindetteme túrindegi májbúrleý sharasy qabyldandy», - dep naqtylady aýdandyq PB bastyǵy, polısııa polkovnıgi Álıhan Baıqadamov.
Sóıtip tabıǵattyń sulý ańy elikti qurtpaq bolyp arnaıy shyqqan qarajúrekter qolǵa tústi.
Soltústik Qazaqstan oblysy