Búgin oblys ákimi Gúlshara Ábdiqalyqova aýyr atletıkadan álem kýboginiń jeńimpazdary Rahat Bekbolat pen Aısamal Sansyzbaevany qabyldady, dep habarlaıdy Egemen.kz.
Aımaq basshysy pandemııa kezeńine qaramastan Syr sportshylary onlaın jarysta da baq synap, aımaq abyroıyn asyryp júrgenin erekshe atap ótti. Sondaı-aq, sporttaǵy jarqyn jetistikter men tolaıym tabystardyń artýyna jattyqtyrýshylardyń eńbegi zor ekenin tilge tıek etti.
- Qazirgi ýaqytta koronavırýs pandemııasy kezeńindegi ýaqytsha shekteýlerge qaramastan oblys sportshylary respýblıkalyq, halyqaralyq onlaın jarystarǵa qatysyp, belsendilikterin kórsetýde. Sonyń bir dáleli – 11-18 qarasha aralyǵynda Perýdiń Lıma qalasynda aýyr atletıkadan jasóspirimder arasynda ótken onlaın álem kýbogynda jerlesterimiz Rahat Bekbolat úshinshi márte álem rekordyn jańartsa, Aısamal Sansyzbaeva qyzdar arasynda kýboktyń «Úzdik sportshysy» atanyp, jeńistiń bıik tuǵyrynan kórindi.
Árıne, jeńis eńbeksiz kelmeıdi. Sportshylarymyzdyń úzdiksiz jattyǵyp, jarysqa jaýaptylyqpen qarap, bilikti jattyqtyrýshylar Arman Abdraev men Nurjan Smahanovtyń daıyndyq prosesin durys uıymdastyrýynyń nátıjesinde osyndaı jetistikterge qol jetkizip otyrmyz,-dedi oblys ákimi Gúlshara Ábdiqalyqova.
Lıma qalasyndaǵy baıraqty básekege 61 elden 399 sportshy qatysqan. Dúnıejúzilik jarysta Qazaqstannyń namysyn 7 sportshy qorǵady, onyń 4-ýi- qyzylordalyqtar.
Qabyldaý barysynda oblys ákimi Rahat Bekbolaev pen Aısamal Sansyzbaevamen pikirlesip, aldaǵy josparlaryn tyńdady. Sporttaǵy árbir jetistikteri men kezekti jeńisterin erekshe ataı otyryp, Álem kýboginiń jeńimpazdaryna noýtbýk tabystady.
Aıta keteıik, Aısamal Sansyzbaeva 2003 jyly 7 tamyzda Qyzylorda oblysy, Shıeli aýdany Bıdaıkól aýylynda dúnıege kelgen. Qazir mektep-ınternat-kolledjdiń 1-kýrsynda oqıdy. Aýyr atletıkadan QR halyqaralyq dárejedegi sport sheberi. Jasóspirimder arasynda Qazaqstan chempıony.
Rahat Bekbolaev 2004 jyly 14 qańtarda Qyzylorda qalasynda dúnıege kelgen. Qazaq gýmanıtarlyq zań jəne tehnıkalyq kolledjiniń stýdenti. Aýyr atletıkadan QR sport sheberi. Jastar arasynda QR qurama komanda múshesi. Jasóspirimder arasynda álem chempıony.