EQYU-nyń tóraǵasy jáne Albanııa premer-mınıstri Edı Rama Qazaqstannyń burynǵy syrtqy ister mınıstri Qaırat Ábdirahmanov uıymnyń az ulttar isteri jónindegi Joǵarǵy komıssary bolyp taǵaıyndalǵanyn málimdedi, dep habarlaıdy Egemen.kz
"Bizde jańa basshylardy taǵaıyndaýǵa bári daıyn ekenine qýanyshtymyn. Helga Shmıd bas hatshy, Matteo Mekachchı DIAQB (Demokratııalyq ınstıtýttar jáne adam quqyqtary jónindegi bıýro - avt. esk.) dırektory, Tereza Rıbeıro BAQ bostandyǵy jónindegi ókili boldy.
Qaırat Ábdirahmanov EQYU-nyń az ulttar isteri jónindegi joǵarǵy komıssary bolyp taǵaıyndaldy", - dedi Rama.
Qaırat Ábdirahmanov Syrtqy ister mınıstrligin 2016 jyldyń jeltoqsanynan 2018 jyldyń jeltoqsanyna deıin basqarǵan bolatyn.
Q.Ábdirahmanov elshi retinde ár jyldary Izraılde, Avstrııada, Slovenııada jumys istegen. 2008-2011 jyldar aralyǵynda EQYU janyndaǵy Qazaqstannyń turaqty ókili bolǵan. Birneshe jyl boıy Qazaqstan Respýblıkasynyń BUU janyndaǵy turaqty ókili qyzmetin atqarǵan.