Petropavldyń polısııasyna Koshýkov kóshesindegi azyq-túlik dúkenderiniń birinen belgisiz jas jigittiń úsh shısha araq pen basqa da zattar salynǵan eki paketti ashyq túrde urlaǵany týraly dabyl túsken. Ol qarapaıym satyp alýshy bolyp dúkenge kirip, eki paket zat alǵan. Al satýshy kelesi taýardy alý úshin bólmeniń túkpirine ketkende, paketin alyp, belgisiz jaqqa qasha jónelgen, dep habarlaıdy Egemen.kz.
Jedel-izdestirý is-sharalary kezinde krımınaldyq polısııa qyzmetkerleri jarty saǵat ishinde beınekameraǵa túsip qalǵan jáne satýshy sıpattaǵan adamǵa uqsaıtyn jigitti ustady. Ol Shal aqyn aýdanynyń 31 jasar turǵyny bolyp shyqty. Polıseıler ustaǵan kezde ol dúkennen urlaǵan ashy sýǵa lyq toıyp, mas kúıde bolǵan. Qazir onyń ústinen qylmystyq is qozǵaldy.