Petropavldyń polıseıleri esirtki taratqan qylmysy úshin jeti jyldan astam ýaqyt izdeýde júrgen 61 jasar áıeldi ustady. Ol qalalyq polısııa basqarmasynyń krımınaldyq polısııa bólimine túsken jedel aqparattyń arqasynda múmkin boldy, dep habarlaıdy Egemen.kz.
Habar berýshi 2013 jyldan beri izdeýde júrgen áıeldiń «Jumysshy kentinde» jasyrynyp júrgeni týraly aıtqan. Osydan segiz jyl buryn qalalyq polıseıler «geroın» esirtkisin taratqan Petropavl qalasynyń bir turǵynyna qatysty qylmystyq isti tergegen. Tergeý barysynda qylmysqa onyń 1959 jyly týǵan anasynyń qatystylyǵy da anyqtaldy. Alaıda tekserý barysynda áıeldiń úıinen belgisiz jaqqa jaltaryp ketken. Oǵan 2013 jyly izdeý jarııalanǵan. Endi sol áıeldiń habary shyǵyp otyr.
Petropavl qalasy PB bastyǵynyń orynbasary, polısııa kapıtany Jasulan Baldıkovtyń sózinshe, tekseris barysynda áıeldiń júrgen jeri týraly jedel aqparat rastaldy. Ol «Jumysshy kentiniń» ortalyǵynda ornalasqan jeke menshik úılerdiń birinen ustaldy. Qylmystyq jaýapkershilikten jaltarý maqsatynda ol 2012 jyly Qostanaı qalasyndaǵy alys týystaryna ketkenin aıtty. Sońǵy tórt jylda - Petropavldyń «Jumysshy kentindegi» týysynyń úıinde qaıta tura bastaǵan. Osy jyldary úıden eshqaıda shyqpaı, tártip saqshylarynan tyǵylyp júrgen. Aıtýyna qaraǵanda sońǵy tórt jylda alǵashqy ret tanysynyń úıinen bir jumysymen shyǵyp, birden polıseılerdiń qolyna túsken. Biraq onyń bul sózi kúmándi. Osynsha ýaqyt úıden shyqpaýy múmkin emes. Eger jedel aqparat berýshi bolmasa onyń polısııanyń qolyna túsýi de neǵaıbil edi.
Qazir áıel Petropavl qalasy ýaqytsha ustaý oqshaýlaǵyshyna qamalyp, ústinen tergeý júrgizilýde.