Baıqońyr qalasyn damytý maqsatynda jol kartasy ázirlenip, juldyzdy shahardyń áleýmettik-ekonomıkalyq máselelerin damytý, QR azamattarynyń turǵyn úılerin jekeshelendirý, ınfraqurylymyn qaıta jańartý, jańa turǵyn úı salýǵa baǵyttalǵan jobalar men baǵdarlamalar júzege asyrylyp jatyr, dep habarlaıdy Egemen.kz.
Bul týraly óńirlik kommýnıkasııalar qyzmetinde ótken brıfıngte QR Prezıdentiniń «Baıqońyr» keshenindegi arnaýly ókiliniń qyzmetin qamtamasyz etý basqarmasynyń basshysy Jasulan Abatov habarlady.
Atalǵan jobalar aıasynda sý burý júıeleri qaıta jańartylypty. Sondaı-aq, «Nurly jer» baǵdarlamasy boıynsha kóppáterli turǵyn úı qurylysy júrgizilip jatyr.
«Baıqońyrda bilim berý jáne densaýlyq saqtaý salasyndaǵy mamandardyń sanyn kóbeıtý de qolǵa alyndy. Sonymen qatar, qalanyń oıyn-saýyq jáne týrıstik áleýetin arttyrý úshin «Rossııa» qonaq úıiniń ǵımaratyn jaldan shyǵarý máselesi sheshilýde. Munan ózge, álemdik standarttaǵy qonaq úı keshenin ashý úshin qazaqstandyq ınvestorlar shaqyryldy. Osynyń bári qalada jańa jumys oryndaryn ashýǵa múmkindik beredi», dedi Jasulan Ýálıuly.