Mereke qarsańynda qaýip kúsheıdi

Kóp elde jeltoqsan  aıy otbasylyq meıramdarǵa toly. Bul aıda barlyǵy qaladan qalaǵa, elden elge saıahattap, jaqyndarymen kezdesýge asyǵady. El úkimetteri men densaýlyq saqtaý salasynyń ókilderi osyǵan baılanysty dabyl qaǵady. Máselen, Italııa Roj­destvo qarsańyndaǵy demalys kúnderine jartylaı lokdaýn jarııalady. Eldiń premer-mınıstri Djýzeppe Konte bul shekteýdi engizý ońaı bolmaǵanyn aıta kele, otbasylar men jaqyndardyń jıyny vırýstyń taralýyn qaıta órshitýi múmkin degen alańdaýshylyq bildirdi. Bul qadam Lombardııa, Veneto jáne Lasıo óńirlerinde vırýs juqtyrǵandar sany­nyń qaıta ósýine baılanysty jasalyp otyr. Este bolsa, dál osy Italııa Eýropa elderiniń ishinde vırýstan eń kóp zardap shekken el sanalady. Vırýstan qaıtys bolǵandar sany boıynsha da kári qurlyqta alda tur. Qabyldanǵan sheshim negizinde 21 jeltoqsannan 6 qańtarǵa deıin mereke jáne demalys kúnderi qoz­ǵa­lysqa qatań shekteý qoıylady. Al qo­naqqa eki adamnan artyq barýǵa bolmaıdy.

Eýropanyń basqa elderi de demalysqa oraı qatań sharalar qarastyrǵan. Máse­len, Nıderland bes aptalyq lokdaýn engizse, ótken aptada Germanııa eldegi COVID-19 juqtyrǵandardyń ósýin toqtatý úshin karantın sharalaryn 19 qańtarǵa deıin kúsheıtken. Al Aýstrııa Rojdestvodan keıin birden úshinshi lokdaýn engizetinin málimdedi.

Kórshiles ózge elder qatań sharalar qoldanǵanda Shvesııa áý basynda koronavırýspen kúrestiń basqa jolyn tańdaǵany belgili. Turǵyndarǵa maska taǵý, barlar men restorandardyń jumysyn shekteý sekildi qarapaıym bolyp kóringen qaýipsizdik sharalary engizilmedi. Sol sebepti de Shvesııanyń vırýspen kúres strategııasy kóp synǵa qalǵan-dy. El bıligi osyǵan deıin er­kin bolyp kelgen qaýipsizdik sharalaryn endi qatańdatýdy kózdep otyr. Turǵyndarǵa alǵash ret qoǵamdyq kólikte maska taǵý kerek­tigi aıtyldy. Premer-mınıstr Stefan Leven meıramhanada birge tamaqtana­tyn adamdardyń sanyn eki ese azaıtý jáne alkogol satýǵa komendanttyq saǵat engizý sııaqty basqa da shekteýler aldaǵy ýaqytta kúshine enetinin aıtty. Buryn segiz adam birge tamaqtana alatyn bolsa, qazir olardyń sany tórtke deıin qysqarady jáne keshki 8-den keıin alkogol satýǵa tyıym salynbaq. Saýda ortalyqtary men fıtnes zaldarda da ózgerister bolady. Joǵary synyp oqýshylary 24 qańtarǵa deıin qashyqtan oqıdy. Munyń barlyǵy meıram qarsańyndaǵy qarbalasty boldyrmaýdyń amaldary bolar. О́ıtkeni Batys elderi úshin Rojdestvo qarsańy dúkenge eń kóp baratyn jáne saıahattaýǵa arnalǵan ýaqyt dese bolady.

Eýropadaǵy jaǵdaıdy qıyndatqan taǵy bir oqıǵa Brıýssel sammıtine qatys­qan kóshbasshylardyń biri – Fransııa prezıdenti Emmanýel Makron­nyń koronavırýs juqtyrǵany boldy. Alǵashynda saıasatkerdiń indetti naq­ty qaıda juqtyrǵany belgili bolma­ǵany­men, osy iri sharaǵa nazar birden aýdy. Eýropalyq Odaq ókilderi is-shara­ny uıymdastyrý barysynda barlyq qaýip­sizdik sharalary oryndalǵanyn aıta­dy. Alaıda Makronmen kezdesken barlyq kóshbasshylar men saıasatker­ler oqshaýlanyp, baqylaýǵa alynǵan. Bir kúnnen keıin jıynǵa qatysqan taǵy bir kóshbasshynyń – Slovakııa premer-mınıstri Igor Matovıchtiń indet juqtyrǵany belgili boldy. Jalpy, osyǵan deıin vırýs juqtyrǵan basshylar qatarynda Armenııa premer-mınıstri, Belarýs prezıdenti, Bolgarııa premer-mınıstri, Horvatııa premer-mınıstri, Monako knıazi, Polsha prezıdenti men Ulybrıtanııanyń premer-mınıstri bolǵan.

Mereke qarsańynda qatań sharaǵa kóshken elder qatarynda Ulybrıtanııa da bar. Densaýlyq saqtaý ókilderin Ang­lııanyń ońtústik-shyǵysynda tez taralyp jatqan koronavırýstyń jańa qarqyny alańdatyp otyr. Ulybrıtanııanyń Den­saýlyq saqtaý mınıstri Mett Hankok alǵash ret koronavırýstyń mýtasııalanǵan túri London men Anglııanyń ońtústik-shy­ǵysynda áldeqaıda jyldam taralyp jat­qanyn aıtqan edi. Borıs Djonsonnan bastap el úkimeti bul qaýipti birden qaper­ge aldy. Alaıda jańa vırýs týraly ǵylymı ne ózge de dálelder joq. Eýro­panyń aldyndaǵy qazirgi mindet – mereke kúnderin aman-esen ótkizý bolyp otyr.