Soltústik Qazaqstan oblysynyń aýmaǵynan eki eldiń polısııasy áriptestiginiń arqasynda Reseı Federasııasynyń tártip saqshylary izdestirip júrgen 20 kúdikti tabyldy, dep habarlaıdy Egemen.kz.
Al Reseıden Qazaqstannan qashqan 25 kúdiktiniń mekenjaıy anyqtalyp otyr.
Sheteldegi áriptestermen ornatylǵan yntymaqtastyq arqasynda sot pen tergeýden jasyrynǵan 25 qylmyskerdiń júrgen jeri anyqtaldy. Ázirge Reseıde anyqtalǵan eki soltústikqazaqstandyq elge qaıtaryldy, deıdi SQO polısııa departamenti krımınaldyq polısııa basqarmasy izdestirý bóliminiń bastyǵy Seıilhan Jumaǵulov.
Sonyń ishinde, ótken jyly halyqaralyq izdeý jarııalanǵan 46 jastaǵy soltústikqazaqstandyq osy aıda Sankt-Peterbýrgte ustalǵan. Ol urlyq jasaǵany úshin sottalǵan bolatyn. Eshqaıda ketpeý týraly qolhatpen júrgen ol sot otyrysyna kelmeı, Sankt-Peterbýrgke tabanyn jaltyratqan. Biraq onda da jaı júrmeı qaraqshylyq shabýyl jasaǵan kúdikti retinde qýdalanypty.
Qylmyskerlerdi qýdalaý barysyndaǵy eki eldiń polıseıleri arasyndaǵy áriptestik jalǵasyn tabýda.