Aqtóbe oblysyn Yrǵyz aýdany Janys bı eldimekeniniń turǵyndary kógildir otynǵa qol jetkizdi, dep habarlaıdy Egemen.kz.
Oblys ákimi Ońdasyn Orazalın oblys ortalyǵynan 450 shaqyrym Janys bı aýylyna kelip kógildir otynǵa qol jetkizgen turǵyndardyń qýanyshyn bólisti. Osyǵan deıin kómir jaǵyp, kúl shyǵaryp kelgen Janys bı aýylyndaǵy árbir otbasy qysqa shamamen 8-10 tonna kómir satyp alsa, qazir Aqtóbeden tasymaldaýshylar onyń ár tonnasyn aýylǵa 25 myń teńgeden ákelip satyp jatyr. Kógildir otynǵa qol jetkizgen Janys bı aýylynyń adamdary úshin bir jaǵynan kómir jaǵyp, kúl shyǵarýdyń beıneti azaısa, ekinshi jaǵynan gazdyń tólemi kómir baǵasynan áldeqaıda arzanǵa túsedi dep qýanyp otyr.
Osydan úsh jyl buryn Yrǵyz aýdanyna qaraı magıstraldy gaz qubyry Shalqar aýdanynyń Shetyrǵyz eldi mekeninen júrgizile bastaǵan edi. Gaz qubyrynyń bir tarmaǵy Janys aýylynyń shetine jetip, aýylishilik taratý jelileriniń júrgizilýi kidirińkirep qalǵanda, osy jyldyń sońynda oblystyq bıýdjetten qosymsha 188 mln teńge bólindi. Osy qarajatqa eń aldymen Janys bı aýylynyń ishindegi gaz taratý jelileri tolyq aıaqtalyp, turǵyn úılerge kógildir otyn qosyldy. Endi Janys bı aýylynan 25 shaqyrym jerdegi Sheńbertal aýylyn gazdandyrý jumystary jalǵasady. Ara qashyqtyǵy 30-40 shaqyrym bolatyn osy aýyldar tolyq kógildir otyn jelisine qosylsa, onda turǵyndarynyń sany 15 myńnan asatyn Yrǵyz aýdanynyń tabıǵı gazben qamtylý deńgeıi 60 paıyzdan aspaqshy. Búginde bul kórsetkish aýdan kóleminde 40,8%-ǵa jetken.
Sheńbertaldan soń ári qaraı Qurylys, Aqshı aýyldarynyń úılerine gaz kirgiziledi. Qazir qys mezgilindegi aýa raıynyń qolaısyzdyǵyna baılanysty qurylys-montajdaý jumystary baıaýlaǵanymen, kóktem shyǵa osy úsh aýylǵa gaz qubyryn tartý jumystary qaıta jandanady dep kútilýde.
Osylaısha Aqtóbe oblysynda turǵyndarynyń sany 1000 adamnan asatyn eldi mekenderge gaz qubyryn tartý jumystary qarqyndy júzege asyp jatyr. Ońdasyn Orazalın aýdan turǵyndarymen kezdesýinde 2021 jyly Yrǵyz eldi mekeninen Qutıkól men Jarma aýyldaryna qaraı magıstraldi gaz qubyryn tartý jumystary bastalatynyn jetkizdi.
Kelesi jyly Aqtóbe oblysynda 6400 turǵyny bar 10 eldi mekendi gazdandyrý jobasy qolǵa alynyp, oǵan 1,8 mlrd teńge qarjy qarastyryldy. Jospar tolyǵymen iske assa, 2021 jyldyń sońyna qaraı Aqtóbe oblysynyń eldi mekenderin gazben jabdyqtaý kórsetkishi 92,1%-ǵa jetedi.