Qyzyljar qalasynda azyq-túlikterdi saqtaý, suryptaý jáne kóterme saýdamen bólip satý ortalyǵy ashyldy.
Tolyq qýatynda jumys istegende 60 adamdyq jumys ornyn ashatyn alyp qoımany jasaýǵa 1,9 mlrd teńge qarajat jumsalǵan. Jumysshylardyń demalys oryndary uıymdastyrylǵan qoımada 2 myń tonna kókónis jáne 10 myń tonna basqa da azyq-úlik túrlerin saqtaıtyn oryndar bar. Keshenniń syıymdylyq aýmaǵy 7 myń tonnany quraıdy. Temperatýralyq jáne ylǵaldylyq rejimderdi qamtamasyz etetin qural-jabdyqtary da tolyq. Sonymen qatar qoımaǵa kelgen júkterdi túsirý jáne qaıta tıep jiberý merzimi de ozyq tehnıkalar arqyly azaıtylǵan. Mundaı qoımalar álemdik standarttarda V kategorııasynda eken, odan joǵary tek A kategorııasy ǵana.
Oblys ákimi Qumar Aqsaqalov qoımany aralap kórip, oblys halqyn sapaly azyq-túlikpen qamtamasyz etetinine senim bildirdi. «Endi bizdiń azyq-túlik taratýshy bıznesmenderimiz ony kóterme baǵamen bir-aq jerden alady. Alystan kelgen kókónister men jemister de alýshysyn kútip kóp jatyp qalmaı, tezirek ótetin bolady. Bul taýardyń sapasyn joǵaltpaı turyp turǵyndarǵa tezirek jetkizilýine qolaıly jaǵdaı týǵyzady. Saıyp kelgende bul turǵyndarymyz úshin de qolaıly», dedi Q.Aqsaqalov.
Azyq-túlik saýdasyndaǵy taǵy bir jetistik – endi oblysta usaq saýdagerler men deldaldar azaıyp, «Radýga», «Soltústik» SKK sııaqty kompanııalar taýardy bir jerden satyp alyp, birden saýda oryndaryna túsiredi. Sóıtip azyq-túliktiń bir qoımadan ekinshi qoımaǵa kóshýi barynsha azaıtyldy. Osynyń ózi bıznestiń shyǵynyn azaıtyp, baǵanyń túsýine de yqpal etýde. Jańa ortalyqtandyrylǵan qoıma óńirdi jyldyń barlyq mezgilinde azyq-túlikpen tolyq qamtamasyz etetin bolady.
Soltústik Qazaqstan oblysy