Arqalyq qalasyndaǵy Dala ólkesi tarıhy oblystyq murajaıyndaǵy qundy jádigerlerdiń biri – Torǵaıdaǵy ult-azattyq kóterilisiniń bas sardary Amangeldi Imanovtyń qanjary.
Mýzeı qyzmetkeri Batyrlan Saǵyntaevtyń aıtýynsha, «Torǵaı óńirindegi kóterilisshiler Ábdiǵapar Janbosynulyn han kóterip, Kenesarynyń bas batyrlarynyń biri bolǵan Iman batyrdyń nemeresi Amangeldi Úderbaıulyn sardarbektikke saılaǵan. 1916 jyly 21 qazan kúni qazirgi Jangeldın aýdanynyń kóleminde jatqan Tatyr kóliniń jaǵasynda jazalaýshy otrıadtar men Amangeldi sarbazdarynyń arasynda alǵashqy shaıqas bolǵan. Tarıhta Tatyr shaıqasy degen atpen qalǵan keskileste 21 jastaǵy Ǵapbas Salamatuly atty jas sarbaz jazalaýshy otrıadtyń barlaýshysyn atyp jyǵyp, óziniń erligimen kózge túsedi. Ǵapbastyń erligine rıza bolǵan Amangeldi batyr oǵan óziniń qanjaryn syıǵa bergen. Ǵapbas azamat soǵysy jyldarynda da áskerı is-qımyldarǵa belsene aralasyp, ólkede beıbit ǵumyr ornaǵannan keıingi kezeńde halyq soty, bolystyq keńestiń tóraǵasy sııaqty jaýapty qyzmetterdi atqarǵan. 1972 jyly Arqalyq qalasyndaǵy Dala ólkesi tarıhy murajaıy ashylǵanda Ǵapbas Amangeldi syıǵa tartqan qanjardy osy murajaıǵa tapsyrǵan. Qanjardy murajaıdyń sol ýaqyttaǵy basshysy Tańatqan Rysaev qabyldap alǵan».
Murajaıdaǵy qundy jádigerlerdiń biri sanalatyn qanjar Zlatoýst qarý-jaraq zaýytynda 1863 jyly jasalǵan. Qanjar eki júzdi. Bolattan jasalyp, saby jezden quıylǵan. Qanjardyń sabynda jasalǵan jyly (1863) men eki basty samuryq beınelengen tańbasy bar. Qanjardyń uzyndyǵy – 64 sm, júzi – 49 sm, saby – 15 sm. Júziniń eni – 4 sm. Salmaǵy – 1030 gr. Qynynyń túbindegi metall bóligi túsip qalǵan. Qynnyń baýy qoldan taǵylǵan.
Búginde murajaıdyń qundy jádigerleriniń biri sanatyndaǵy batyr qanjary 1916 jylǵy kóteriliske arnalǵan ekspozısııa zalynda Amangeldiniń Ábilhan Qasteev salǵan portreti, Keıki batyr úıiniń kebejesi sekildi kóne jádigerlermen birge saqtaýly tur.
Qostanaı oblysy