Osyǵan deıin Soltústik Qazaqstan oblysyndaǵy medısınalyq mekemelerdiń kólikke degen suranysy joǵary edi. Byltyr 38 jedel-járdem kóligi satyp alyndy, barlyq medısınalyq qural-jabdyqtardy jańalaýǵa qarajat 32 paıyzǵa artyq bólindi. Bul – 3,7 mlrd teńge degen sóz. Jańadan ashylǵan ınfeksııalyq aýrýhana qazir jumys istep tur.
Jyl boıy 8 jyljymaly medısınalyq keshen satyp alynyp, alys aýdandar turǵyndarynyń densaýlyqtaryn qadaǵalaý múmkindigi artty. Qazir oblystyq aýrýhanada sıfrly angıografty ornalastyrý jumystary júrip jatyr. Bul qan tamyrlaryn kontrasty zertteý tásilderin bir arnaǵa shoǵyrlandyratyn, óziniń quramyna rentgen, kompıýterlik tomografııa, magnıtti-rezonansty tomografııa sııaqty zertteýlerdiń báriniń basyn qurap, bir qorytyndy shyǵaratyn qural. Jańa apparat dıagnozdy barynsha durys qoıa alatyndyǵymen belgili. Osy qymbat qural oblystyq aýrýhanaǵa ornatylyp, óńir turǵyndaryna qyzmet kórsete bastaıdy. Sonymen birge jańadan taǵy bir MRT (magnıtti-rezonansty tomografııa) satyp alynbaq. Oǵan da tıisti qarajat bólingen, aldaǵy aqpan aıynda oblysqa jetkiziledi.
Árıne medısına salasyndaǵy barlyq jaǵdaı óte jaqsy dep aıta almaımyz. Máselen, 250 adamdy birden qabyldaı alady delingen jańa emhananyń qurylysy belgilengen merziminde aıaqtalmady. Onyń qurylysynyń kestege saı júrgizilýine birinshi kezekte indet kesirin tıgizdi. Kórshi elderden jetkizilýge tıisti qurylys materıaldary karantınniń áleginen ýaqytynan keshiktirildi. Endi onyń qurylysyn aıaqtaý bıylǵa qalyp otyr. Túrik kompanııasy salyp jatqan 480 orynǵa arnalǵan kóp beıindi aýrýhananyń qurylysy da osy sebepti syzbadan qalyp keledi.
Sondaı-aq óńirde dárigerlerdiń eńbekaqysy 31 paıyzǵa kóterildi. Al orta deńgeıdegi medısınalyq personaldardyń jalaqysy 20 paıyzǵa artty. Pandemııa indetine qarsy kúresken medısına qyzmetkerleriniń bárine Densaýlyq saqtaý mınıstrligi bekitken kategorııalarǵa sáıkes qosymsha aqy tolyq tólendi. Bıyl dárigerlerdiń eńbekaqysy atqarǵan qyzmetine sáıkes taǵy da arta túspek.
Medısınanyń jas kadrlaryn daıyndaýǵa da nazar bólinip otyr. 2021 jyly qaladaǵy medısınalyq kolledjdiń oqýshylaryna arnalǵan 344 oryndy zamanaýı jatahana turǵyzý josparlanyp otyr. Bul jataqhananyń shyǵyny osy jyldyń bıýdjetinde qarastyrylǵan. Jataqhana aýyl jastarynyń oqýǵa degen múmkindigin arttyrary sózsiz.
Soltústik Qazaqstan oblysy