«Uly Dala Qyrandary» respýblıkalyq qoǵamdyq birlestigi eldiń mádenı jáne áleýmettik-saıası ómirine eleýli úles qosyp júrgen memleket qaıratkerleri men zııaly qaýym ókilderi arasynda 2020 jyldyń úzdikterin anyqtady, dep habarlaıdy Egemen.kz Bul jyly birlestik otyrysynyń sheshimimen «JYL TULǴASY» nomınasııasy Qazaqstan Respýblıkasynyń Sybaılas jemqorlyqqa qarsy is-qımyl agenttiginiń tóraǵasy Alık Shpekbaevqa berildi.
Qoǵamdyq birlestiktiń tóraǵasy, QR eńbek sińirgen qaıratkeri, jazýshy Sádibek Túgeldiń aıtýynsha, A.Shpekbaev «Halyq únine qulaq asatyn memleket» tujyrymdamasyna sáıkes qala, aýdan, aýyldyq ákimdikterdi servıstik úlgige tolyǵymen kóshirýdegi qomaqty úlesi, memlekettik qyzmetterdi sıfrlandyrýǵa belsene qatysý, memlekettik apparattyń ashyqtyǵy men tutynýshyǵa baǵdarlanýyn qamtamasyz etýge baǵyttalǵan respýblıkalyq «Adaldyq alańy» jobasyn nasıhattaý, qoǵam pen memleket arasyndaǵy dıalog alańyna aınalǵan «Antikor Ortalygyn» ashý, sonymen qosa sybaılas jemqorlyqqa qarsy jańa zańnamalardy iske asyrý jáne t.b. birqatar bastamalary úshin marapattalǵan.
Eske salaıyq, osyǵan deıin bul nomınasııaǵa Elbasy – Tuńǵysh Prezıdent Nursultan Nazarbaev, Jambyl oblysynyń ákimi Berdibek Saparbaev ıe bolǵan edi. Sol sııaqty 2011 jyldan beri elimizdegi tanymal tulǵalar birlestik laıyq dep tapqan nomınasııalardy ıelenip keledi.
Aıta keteıik, qoǵamdyq birlestiktiń maqsaty – halyqty birlikke, yntymaqqa shaqyrý, ulttyq qundylyqtardy ulyqtaý, jastardy patrıottyq tárbıeleý, jemqorlyqqa qarsy pármendi kúres júrgizý.