Qasym-Jomart Toqaev Kenııa Prezıdenti Ýılıam Rýtoǵa I dárejeli «Dostyq» ordenin tapsyrdy. Memleket basshysy búgingi joǵary deńgeıdegi kelissózder Qazaqstan-Kenııa qarym-qatynasyn odan ári tereńdetýge, ony jańa deńgeıge shyǵarýǵa berik negiz qalaǵanyn aıtty, dep habarlaıdy Egemen.kz.
«Qarym-qatynasymyzdy damytýdaǵy kúsh-jigerińiz erekshe mańyzǵa ıe. Sizdi Qazaqstanda senimdi dos jáne halyqaralyq deńgeıdegi kórnekti memleket qaıratkeri retinde tanıdy. Kenııany ekonomıkalyq turǵydan órkendetýge, eldi jańǵyrtýǵa, halyqtyń ál-aýqatyn arttyrýǵa baǵyttalǵan aýqymdy reformalaryńyz qurmetke laıyq», dedi Qazaqstan Prezıdenti.
Memleket basshysy Kenııa Prezıdentiniń Afrıkadaǵy birlikti saqtaýǵa, álemdik qoǵamdastyqpen mazmundy seriktestikti damytýǵa yqpal etetin syndarly dıalogqa beıil ekenin atap ótti.
«Qazaqstan men Kenııa arasyndaǵy yntymaqtastyqty nyǵaıtýǵa eleýli úles qosqanyńyzdy eskere otyryp, Sizge I dárejeli «Dostyq» ordenin tapsyrýdy zor mártebe sanaımyn. Bul joǵary marapat – Qazaqstannyń sheksiz qurmeti men rızashylyǵynyń, senim men ózara qurmetke negizdelgen qarym-qatynasty jandandyrý nıetiniń belgisi», dedi Qasym-Jomart Toqaev.
Memleket basshysy Kenııa Prezıdentimen shaǵyn quramda kelissóz júrgizdi
Ýılıam Rýto joǵary nagradamen marapattaǵany úshin Memleket basshysyna alǵys aıtty.
«Men birlik, ózara qurmet pen yntymaqty beıneleıtin atalǵan ordenmen marapattalǵanyma qýanyshtymyn. Kenııa jurty da Qazaqstan halqy sııaqty úılesimdi órkendeýge umtylady. Bul elderimizdiń dostyq rýhyndaǵy seriktestigin odan ári nyǵaıtýǵa jol ashady dep senemin», dedi Kenııa Prezıdenti.
Buǵan deıin Qazaqstan men Kenııa prezıdentteri keńeıtilgen quramda kelissóz júrgizgeni týraly habarlaǵanbyz.