Oqý-aǵartý mınıstrligi mektep bitirý keshterin meıramhana, banket zaly, demalys orny men tabıǵat aıasynda ótkizýge tyıym salynǵanyn taǵy eske saldy. Sonymen qatar mektepterge ata-analar men oqýshylardan aqsha jınaýǵa, merekege syılyq ne ózge de materıaldyq qundylyq talap etýge bolmaıdy. Bul máselege qatysty Májilis depýtaty Ashat Aımaǵambetov pikir bildirip, elimizdegi kóptegen merekeniń áldeqashan «dańǵoılyq jármeńkesine» aınalyp ketkenin aıtty, dep jazady Egemen.kz.
«Men telefonmen-aq sýretke túsirip, 10 mınýtta vınetka jasap bere alamyn. Oǵan ne úshin ondaǵan myń teńge tóleý kerek?», dedi depýtat.
A. Aımaǵambetov mektep bitirýshiler men ata-analardyń 11 jyldyq oqý aıaqtalǵan soń este qalarlyq ádemi kesh ótkizgisi keletinin túsinetinin jetkizdi. Degenmen ol Oqý-aǵartý mınıstrligi men Ishki ister mınıstrliginiń ustanymyn da eskerý qajet ekenin atap ótti. Onyń aıtýynsha, qoıylǵan shekteýler eń aldymen qaýipsizdik pen áleýmettik ádildik máselesine baılanysty.
Depýtat keıbir otbasylardyń bitirý keshine 1 mıllıon, 500 myń, tipti 300 myń teńge kóleminde aqsha suralatynyna shaǵymdanatynyn aıtty.
Astanadaǵy mektepte atys uıymdastyrmaq bolǵandar ustaldy
Sonymen qatar depýtat mekteptegi resmı is-sharalar toqtatylmaıtynyn erekshe atap ótti. Sońǵy qońyraý, saltanatty jıyndar men mekteppen qoshtasý rásimderi dástúrli túrde ótkizile beredi.
«Osy áserli sátterdiń eshqaısysy joıylmaıdy», dedi ol.
Sonymen birge depýtat eresekterdiń baqylaýynsyz keıbir túlekterdiń meıramhana men kottedjderde óz betinshe toılaýǵa barýy múmkin ekenin de jasyrmady.
Buǵan deıin, Taldyqorǵanda mektep oqýshysy stýdentti óltirdi degen kúdikke ilingeni týraly habarlaǵanbyz.