Álemde 87 mıllıon adam koronavırýs juqtyrdy. Bul týraly Egemen.kz koronavırýstyń taralýyna jol bermeý jónindegi QR Úkimeti janyndaǵy vedomstvoaralyq komıssııanyń aqparatyna silteme jasap, álemdegi epıdemıologııalyq ahýal jóninde habarlaıdy.
Qazir búkil álem qaýymdastyǵy COVID-19 pandemııasymen kúres júrgizip keldi. SARS-CoV-2 koronavırýsynyń taralýy bastalǵannan beri álemde 87 mıllıonnan astam adam indetti juqtyrdy. Shamamen 1,9 mıllıon adam qaıtys boldy, 63 mıllıonnan astamy saýyǵyp shyqty.
Avstralııa koronavırýsqa qarsy vaksınalaýdy erterek bastaýǵa nıetti – naýqan naýryz aıynan, aqpan aıynyń birinshi jartysyna aýystyryldy. Pandemııa bastalǵaly elde 28 543 adam indetti juqtyrǵany rastaldy, 909 adam qaıtys bolyp, 25 806-sy jazyldy.
Materıktik Qytaıda COVID-19 juqtyrýdyń jańadan 63 jaǵdaıy anyqtaldy. Onyń 11-i shetelden kelgenderden anyqtalsa, taǵy 52-si Hebeı men Lıaonın provınsııalaryna tıesili. Germanııa pedıatrlary balalar men jasóspirimderdi vaksınasııalaýdy tezirek bastaýǵa shaqyrýda.
Bul, mektepter men balabaqshalardyń qalypty jumysyn qaıta bastaýǵa múmkindik beredi. Federaldy pedıatrlar qaýymdastyǵynyń basshysy Tomas Fıshbah «balalarǵa arnalǵan arnaıy vaksınany múmkindiginshe tezirek jasap, sertıfıkattaýdan ótkizý qajet», dep atap ótti.
Sonymen qatar Germanııanyń eki iri farmasevtıkalyq kompanııasy jaqyn arada koronavırýsqa qarsy vaksınany birlesip shyǵarýǵa nıetti. Alıans halyq arasynda ekpe egý úrdisin jedeldetý úshin jáne Germanııanyń barlyq turǵyndaryn jaz mezgiline deıin ekpemen qamtý maqsatynda qurylǵan.