Soltústik Qazaqstan oblysy bıyl qoǵamdyq tasymaldaý isterine 100 jańa avtobýs satyp almaqshy. Qazir sonyń birazy kelip úlgerdi, dep habarlaıdy Egemen.kz.
Oblys ákimi Qumar Aqsaqalov óziniń tvıtterdegi paraqshasynda bylaı dep jazdy: «Biz Petropavl qalasynyń avtobýs parkyn jańalaý jobasyn iske asyrýǵa kiristik. Qala kóshelerinde barlyǵy 200-deı avtobýstar júredi, biz sonyń jartysyn jańalaýdy qolǵa aldyq. Avtobýstardyń bári Qazaqstanda jınalǵan reseılik kólikter. Alaıda olar burynǵylarǵa qaraǵanda áldeqaıda yńǵaıly. Osyndaı 100 avtobýs satyp alýǵa keliskenbiz, qazir sonyń jeteýi qalaǵa jetkizildi», degen ol.
Árıne, olardyń sapasy asa joǵary emes. Biraq burynǵylarǵa qaraǵanda yńǵaıly ári jyly. Salondary da keń. Soltústiktiń sýyq klımatyn esepke alyp, qatpaıtyn alty radıator ornyqtyrylǵan. Kondısıonerleri men pandýstary da bar. Aýany tazalap turatyn júıe men ýltra kógildir lampalary da ornyqtyrylǵan. Ákim óziniń jazbasynda avtobýstardyń jańalanǵanyna qaramaı jolaqysy kóterilmeıtinin de atap ótti. Endi olarǵa elektrondy bılet berý júıesi de ornatylmaq.