Senatorlar Ǵumar Dúısembaev pen Saǵyndyq Luqpanov Atyraý oblysynyń Qyzylqoǵa aýdanynda boldy.
Depýtattar Muqyr aýylyna barǵan kezde mektepte bolyp, qaýipsizdik júıesin tekserdi, sondaı-aq bilim berý sapasy men muǵalimderdiń jalaqysy týraly oılarymen bólisti.
Muqyr stansııasynyń temirjolshylarymen bolǵan kezdesýde osy salanyń ózekti máseleleri qozǵaldy, qyzmetkerlerdiń usynystary men ótinishteri tyńdaldy. Senatorlar óz kezeginde aıtylǵan usynystardy aldaǵy jumys barysynda eskerýge ýáde berdi.
Depýtattardyń sapary Tasqudyq eldi mekeninde odan ári jalǵasty. Turǵyndar aýyz sýmen qamtamasyz etilmegen, gaz qubyry jetkizilmegen eken. Elektr jelisi de qaıta jańǵyrtýdy talap etedi. Senatorlar bul kúrdeli máselelerdi oń sheshýge járdemdesetin bolady.
Senatorlar Qulsary-Muqyr tas jolynyń jaǵdaıyna nazar aýdardy. Osy avtomobıl jolyn qaıta jańartý máselesi depýtattardyń baqylaýynda bolǵandyqtan senator Ǵumar Dúısembaev osy másele boıynsha budan buryn Premer-Mınıstrdiń atyna depýtattyq saýal joldaǵan edi.
Depýtattar sondaı-aq aımaqtaǵy hımııa óndirisinde de bolyp, óńirlik turaqtandyrý qorynyń jumysymen de tanysty. Olar osy qordyń taýarlary saýdalanatyn sýpermarketter jelisine baryp, áleýmettik mańyzy bar taýarlardyń baǵasy týraly habardar boldy. Depýtattar medısınalyq taýarlar qoımasynda da boldy.
Senator Ǵumar Dúısembaev baǵany memlekettik retteý arqyly áleýmettik mańyzy bar taýarlardyń naqty esebin alý jolǵa qoıylýy tıis ekenin atap ótti. Qazirgi kezde azyq-túlik pen medısınalyq taýarlarǵa qatysty dúrbeleńge jol bermeý, jetkizý tetikteri men sórelerdegi baǵalardy únemi baqylaý, alypsatarlyqqa jol bermeý mańyzdy bolyp otyr.