Qyzylorda oblysynda zańsyz aınalymnan atys qarýyn tárkileý, urlanǵan, joǵalǵan qarýdy izdestirý jáne atys qarýyn qoldaný arqyly jasalatyn qylmystardyń aldyn alý baǵytynda «Qarý» jedel-profılaktıkalyq is-sharasy júıeli túrde ótkizilýde, dep habarlaıdy Egemen.kz.
Shara barysynda ótken jyly zańsyz aınalymnan 246 qarý tárkilendi. Quqyq buzýshylar QR ÁQBtK-niń 482 babymen ákimshilik jaýapqa tartyldy. 8 myńnan turǵynnyń ańshy qarýyn saqtaý zańdylyǵy tekserilip, azamattyq, qyzmettik qarýdy, oǵan arnalǵan patrondardy saqtaý, paıdalaný jáne tasymaldaý erejelerin buzý deregimen 542 quqyq buzýshylyq anyqtalyp, ákimshilik sharalar kórildi.
2020 jylǵy 1 shildeden bastap respýblıka kóleminde zańsyz saqtaýdaǵy qarý, oq-dáriler, jarylǵysh zattardy qabyldaý aksııasy ótkizilip, onyń barysynda azamattardan 79 ótinish tústi. 126 dana qarý qabyldanyp, oblysqa respýblıkalyq bıýdjetten bólingen 8 mln 153 myń teńge qarajat tolyǵymen ıgerildi.