Syr boıynyń jazy aptap ystyq bolǵanymen qysy qytymyr keletinin jurttyń bári biledi. Soǵan qaramastan óńirge syrttan neshe túrli jemis-jıdek aǵashtaryn ákelip egip, jersindirip jatqandar bar. Biz olardyń tabıǵaty qatal aımaqtaǵy mundaı talabyna súısingenmen «Basqany qaıdam Qyzylordada ekzotıkalyq ań-qus ósirý qıyn sharýa shyǵar» dep oılaıtynbyz. Josaly kentiniń turǵyny Sharhan Ospanovtyń jańalyǵy bul oıymyzdyń orynsyz ekendigine kózimizdi jetkizdi, dep habarlaıdy Egemen.kz.
Qarmaqshy aýdanynyń ortalyǵynda turatyn Sharhan byltyr jazda Almatydan túıequstyń qol basyndaı 3 balapanyn jetkizipti. Árıne, oǵan deıin tańsyq qusty ábden zerttegen. Bular bastapqy 3-4 aıda kútimdi qatty qajet etedi eken. Sál óskesin sýyqqa boı úıretip, kádimgi qustardyń jemin jeı beretin kórinedi.
«Bala kezimnen osy qusty baǵýǵa qumar boldym. Tipti Afrıkadan Josalyǵa jetkizýdiń josparyn qurǵan sátterim de bolǵan. Keıinnen kádimgi ózimiz úırengen taýyq, túıetaýyq ósire bastadym. Byltyr sáti túsip Almatydan osy balapandardy jetkizip aldym. Qazir sonyń ekeýin ósirip otyrmyn», – deıdi Sharhan Ospanov.
Sharhannyń aıtýynsha túıequstyń boıy 3 metrge deıin ósip, salmaǵy 140 kelige deıin tartady. Qazir ol baqqan balapandar kisi boıynan asady, salmaǵy 50 kelige jaqyndap qaldy.
Qazaq bul qusty túıege beker uqsatpaǵan eken. Jaryqtyq Oısylqara tuqymy eki jylda bir botalasa, túıequstardyń tolyq jetilýine de 2 jyl ketedi. Biraq, jylyna seksenge jýyq jumyrtqa tabady. Onysyn jan balasyna aldyrmaıtyn shálkes minezi taǵy bar.
«Jalpy bular janyna eshkimdi jolata bermeıdi. Almatydaǵy tanysym osy balapandardan jýas qus shyǵady dep tańdap bergen. Shynymen de aıtqanǵa kónetin túri bar. Ázirshe tentektik tanytqan kezi joq. Alda ınkýbator arqyly osy qustardy kóbeıtýdi josparlap otyrmyn», – deıdi Sharhan Ospanov.