Petropavl qalasynyń kóptegen júrgizýshilerinde jol tártibin saqtaý mádenıetiniń tómen ekenin buryn da jazǵan bolatynbyz. Patrýldik polısııa qaptap júrgenimen júrgizýshiler olardan yǵa qoımaıdy. Shaǵyn qalada kem degende saǵatyna 80-90 shaqyrym jyldamdyqpen júrgisi keletin eserler kóp. Ondaılar, ásirese basqa qalanyń nómirin taqqan mashınalardy aldyna túsirgisi kelmeıdi. Balanyń namysqoılyǵy sııaqty sondaı qylyqtardy kórgenińde sananyń tómendigin sezesiń. Sana tómen bolǵan soń mádenıet te bolmaıdy ǵoı.
Polısııanyń málimetine qaraǵanda, ótken jyly oblysta alty myńǵa jýyq júrgizýshi ruqsat etilgen jyldamdyqtan asyryp júrgen. Jalpy, ústimizdegi jyldyń 11 aıynda oblys joldarynda jol tártibin buzýdyń 49 847 faktisi tirkelgen. Barlyq turǵyndarynyń sany 600 myńǵa jetpeıtin, onyń ishinde 18 ben 70 jas arasyndaǵy júrgizýshiler sany kóp bolsa 200 myńdaı bolatyn oblys úshin bul óte úlken san. Buǵan qaraǵanda árbir tórtinshi júrgizýshi jol erejesin buzǵan deýge bolady. Árbir jol erejesin buzýshylyq adam ómirine qaýip tóndiretinin júrgizýshiler bilse kerek edi.
Osy ýaqyt aralyǵynda kóligin mas bolyp júrgizgen 986 júrgizýshi ustalǵan. Al 75 júrgizýshi qarsy baǵytqa shyǵyp ketip, óreskel buzýshylyqqa jol bergen.
Jyldamdyqty asyrý jáne manevr jasaý qaǵıdalaryn saqtamaý jol-kólik oqıǵalarynyń jasalýyna jıi sebep bolady. Júrgizýshiniń nazaryn jol qaýipsizdiginen basqa jaqqa aýdaryp, qyraǵylyǵyn tómendetetin qylyqtardyń qatarynda rýlde kele jatyp telefonmen sóılesý jıi bolyp turady. Atalǵan ýaqytta osyndaı 2352 fakti tirkelgen. 5089 kólik júrgizýshisi qaýipsizdik beldigin taqpaýǵa jol bergen, mundaı jaǵdaıda JKO kezinde zardaptyń aýyrlyǵyn arttyratyny belgili. «Qys kezinde apat táýekeli arta túsedi, buǵan kóktaıǵaq, joldy kómip qalatyn syrǵyma men qatty boran. Osylardyń kesirinen kórý aımaǵy shekteledi. Kóktaıǵaq kezinde eń basty ereje – jyldamdyq rejimin saqtaý jáne araqashyqtyqty ustap otyrý, sonymen qatar jaıaý júrginshiler jolaǵyna jaqyndaǵan kezde jyldamdyqty azaıtý asa mańyzdy», deıdi oblystyq Polısııa departamenti bastyǵynyń birinshi orynbasary, polısııa polkovnıgi Qanat Aıtbaev.
Oblystaǵy JKO kóbeıýine úlken sebep bolyp otyrǵan jaıttardyń biri – júrgizýshiniń masań kúıinde rýlge otyrýy. О́tken jyly oblysta buryn kólik júrgizý quqynan sot sheshimimen aıyrylǵan 37 júrgizýshi masań kúıinde qaıtadan rýlge otyramyn dep ustaldy. Máselen, Aqjar aýdanynyń bir turǵyny bıylǵy aqpan aıynda kólikke mas bolyp otyrǵany úshin 15 táýlikke qamalyp, 7 jylǵa júrgizýshi kýáliginen aıyrylǵan. Degenmen ol osy jyldyń shilde aıynda óz kóligin masań bolyp júrgizip kele jatyp, Gorkovskıı selosynyń túbinde baǵandy soǵyp, taǵy ustaldy. Qarasha aıynyń aıaǵynda bolǵan sot sheshimimen endi ol júrgizýshilik quqynan ǵana emes bas bostandyǵynan da bir jylǵa aıyryldy. Eń qıyny endi bir jyl boıy onyń otbasy, bala-shaǵasy asyraýshysynan aıyrylyp, qıyn jaǵdaıda qaldy.
О́tken jyly 11 qańtarda zańnamaǵa ózgerister men tolyqtyrýlar engizilip, kólikti masań kúıinde júrgizetinderge belgilengen jaza qatańdatyldy. Oǵan sáıkes mas bolyp ekinshi ret ustalǵandar júrgizýshilik quqynan ómir boıyna aıyrylady. Alaıda kóligi qorasynda turǵan keıbir júrgizýshiler oǵan qaramaı, kóliginen túspeıdi. Sondyqtan zańnama júrgizý quqynan aıyrylǵan adamdy kóligin birden satýyn da mindetteýi kerek edi. Mundaı jaza kýálikten aıyrǵannan góri áldeqaıda áserli bolar edi... Aldaǵy ýaqytta sondaı da jaza shyǵatyn shyǵar degen úmit bar. Sonda jol apaty da azaıyp, adam ómirine keletin qaýipter de kemıtin edi.
Soltústik Qazaqstan oblysy