Eńbek jáne halyqty áleýmettik qorǵaý mınıstrligi Qazaqstandaǵy ortasha zeınetaqynyń qansha bolatynyn atady, dep habarlaıdy Egemen.kz
Mınıstrliktiń málimetinshe, 2020 jyldyń qańtar-jeltoqsan aılarynda respýblıkalyq bıýdjetten bazalyq zeınetaqyǵa 772,3 mıllıard teńge jáne yntymaqty zeınetaqyǵa 1 721,5 mıllıard teńge tólendi.
«2021 jyldyń 1 qańtaryndaǵy jaǵdaı boıynsha zeınetkerler sany - 2 mıllıon 247 myń adam. Al zeınetaqy tólemderiniń ortasha mólsheri - (bazalyq zeınetaqy tólemin eskere otyryp) 94 733 teńge», delingen habarlamada.
Eske salaıyq, 2018 jylǵy 1 shildeden bastap memlekettik bazalyq zeınetaqy tólemi, onyń zeınetaqy júıesine qatysý ótilin eskere otyryp, ár alýshyǵa jeke taǵaıyndalady.
«Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder (budan ári - MZJ) zeınetaqy júıesindegi eńbek ótiline qosylady. Sonymen, eger zeınetaqy júıesindegi jumys ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy - eń tómengi kúnkóris deńgeıiniń 54 paıyzy, sodan keıin 10 jyldan asqan ár jyl úshin onyń mólsheri 2 paıyzǵa artady. Mysaly, eger qatysý ótili 20 jyl bolsa, bazalyq zeınetaqy eń tómen kúnkóris deńgeıiniń 74 paıyzyn, 30 jyl – eń tómen kúnkóris deńgeıiniń 94 paıyzy. Jumys ótili 33 jáne odan da kóp jyl bolsa, eń tómen kúnkóris deńgeıiniń 100 paıyzy mólsherinde belgilenedi», dep túsindirdi mınıstrlik ókilderi.