COVID-19 pandemııasy kezindegi Qytaıdyń Ýhan qalasyndaǵy ómir týraly baıandaıtyn qujattyń avtory Fan Fan bıliktiń synyna jaýap aıtty. Jazýshy koronavırýs indeti bastalǵan alǵashqy kúnderdegi Ýhandy sıpattaǵany úshin Qytaı úkimeti tarapynan eskertý alǵan, dep habarlaıdy Egemen.kz
«Alda kele jatqan apat jaǵdaıynda óz pikirimizdi bildirip, búkil álemge keńes berý óte mańyzdy», deıdi ol.
Epıdemııa bastalǵannan 76 kúnge sozylǵan oqshaýlaný kezinde Ýhannyń 11 mıllıon turǵynynyń basym kópshiligi Fannyń onlaın kúndelikterin oqýdy ádetke aınaldyrǵan. Sonymen qatar, kúndelikte vırýs alǵash paıda bolǵanda qalanyń shynaıy kórinisin oqyp-bilýge múmkindik bolǵan. Shyndyqty ǵana jarııalap otyrǵna jazýshy osydan keıin Qytaı bıliginiń nazaryna iligipti.
Onyń aıtýynsha, qytaılyq BAQ-qa onyń maqalalaryn jarııalamaýǵa buıryq berilgen. Sonymen qatar, Qytaı basylymdar onyń jańa týyndylaryn da jarııalamaıtyn bolǵan. Jazýshy sonda da óziniń sheginbeıtinin aıtyp otyr. Ol búkil álemge zııan keltirgen koronavırýs týraly jáne Ýhandaǵy jaǵdaıǵa qatysty shyndyq aıtylǵany jón dep biledi.
Fan Fanǵa on myńǵa jýyq qorlaıtyn, ólim tileıtin habarlamalar kelip túsken. Áleýmettik jelilerde ony Batyspen birigip Qytaı memleketine shabýyl jasaý úshin satqyndyq jasaıdy dep aıyptady. Qytaı turǵyndary jazýshyǵa tipti AQSh-tyń barlaý agenttiginiń ózi kúndelik jazý úshin aqsha tólegen dep boljaıdy.