Oblys ákimi Danıal Ahmetovtiń ókimimen Semeıge jańa ákim taǵaıyndaldy. Búgin qalalyq máslıhattyń kezekten tys II sessııasynda depýtattar kópshilik daýyspen Nurymbet Saqtaǵanovtyń kandıdatýrasyn qoldady dep habarlaıdy Egemen.kz.
Aıta keteıik, ol buǵan deıin Ulan aýdanynyń ákimi qyzmetin atqarǵan.
Jańa qala basshysyn aktıvke Danıal Ahmetov tanystyrdy. О́ńir basshysy burynǵy ákim Ermak Sálimovke jumysy úshin alǵys aıtyp, odan ári oblys ákiminiń turǵyn úı-qurylys máseleleri jónindegi keńesshisi bolatynyn atap ótti.
Nurymbet Amanuly 1970 jyly 6 tamyzda Ońtústik Qazaqstan oblysynda dúnıege kelgen. Qyzylorda pedagogıkalyq ınstıtýtyn, Qyzylorda agrarlyq-tehnıkalyq kolledjin, MESA dıstansııalyq bilim berý ınstıtýtyn, MESA Qyzylorda ekonomıka, statıstıka jáne aqparat ınstıtýtyn, S. Amanjolov atyndaǵy Shyǵys Qazaqstan memlekettik ınstıtýtyn muǵalim, zańger, ekonomıka jáne bıznes mamandyqtary boıynsha támamdaǵan.
Eńbek qyzmetin 1992 jyly Qyzylordadaǵy № 172 orta mektebinde muǵalim bolyp bastaǵan. 1993-1994 jyldary QR QK qatarynda bolyp, áskerden keıin Qyzylordadaǵy № 9 orta mektepte jumysyn jalǵastyrdy. 1995-2001 jyldary Qyzylorda oblysy boıynsha Keden basqarmasynyń ınspektory, aǵa ınspektory, bas ınspektory, bólim bastyǵy, bólim bastyǵynyń orynbasary bolyp jumys istedi. 2001-2006 jyldary - QR Memlekettik kiris mınıstrligi Keden komıtetinde bas ınspektor, Tóraǵanyń kómekshisi, bólim bastyǵy boldy. 2006-2007 jyldary - QR Parlamentindegi Úkimet ókildiginiń bas ınspektory, QR Ekonomıka jáne bıýdjettik josparlaý mınıstrliginde bólim bastyǵy, Mınıstrdiń keńesshisi qyzmetin atqardy. 2007-2010 jyldary QR Eńbek jáne halyqty áleýmettik qorǵaý mınıstrliginiń Kóshi-qon komıteti tóraǵasynyń orynbasary boldy. 2010-2012 jyldary QR Prezıdenti Ákimshiliginiń memlekettik ınspektory. 2012-2015 jyldary ShQO ákiminiń orynbasary qyzmetin atqardy. 2015-2018 jyldary ShQO ákiminiń birinshi orynbasary boldy. 2018 jyldan búginge deıin Ulan aýdany ákimi qyzmetin atqardy. Aıta keteıik, jańa ákim jeti bala tárbıelep otyrǵan kópbalaly áke.